އީރާންގެ ވެރިރަށް ތަހްރާނަށް ޔަހޫދީ ފައުޖުން ދިން ރަޙުމު ކުޑަ ޙަމަލާއެއްގައި, ޣައްޒާގައި ވެރިކަން ކުރާ ޙަމާސްގެ ޖަމާޢަތުގެ ސިޔާސީ ގޮފީގެ ވެރިޔާ އިސްމާޢީލް ހަނިއްޔާ ޝަހީދު ކޮށްލުމުން، ދިވެހިރާއްޖެއިން އެކަން ކުށްވެރިކޮށްފިއެވެ.

ޚަރީޖީ ވުޒާރާއިން ނެރުއްވި ނޫސްބަޔާނެއްގައި ވިދާޅުވީ، ބުދަ ދުވަހުގެ ހެނދުނު ދިން މި ޙަމަލާގައި ހަނީއްޔާ އަވަހާރަކޮށްލުމުން އެކަން ހަރުކަށި އިބާރާތުން ކުށްވެރި ކުރާ ކަމަށެވެ.

ދުނިޔޭގެ ޤައުމުތަކުގެ ބައިނަލްއަޤްވާމީ ޤާނޫނުތަކާއި، އިންސާނީ ހައްޤުތަކާގުޅޭ ޤާނޫނުތައް ނަގަހައްޓަން ޖެހޭކަމަށް މި ބަޔާނުގައިވެއެވެ. އަދި ޢައްޒާގެ މައްސަލައަށް ދެމެހެއްޓެނިވި ހައްލެއް ގެނެސް ސަރަޙައްދުގައި ސުލްހަ މަސަލަސްކަން ޤާއިމްކުރަން ޤައުމުތަކުން ގުޅިގެން މަސައްކަތް ކުރުމަށް ދިވެހި ސަރުކާރުން ވަނީ ގޮވާލައްވާފައެވެ.

Advertisement

ތަހްރާންގައި ހަނިއްޔާ ހުންނެވި ގެއަށް ޔަހޫދީ ފައުޖުން ޙަމަލާ ދީފައި ވަނީ ގައިޑެޑް ޕްރޮޖެކްޓައިލެއް ބޭނުން ކޮށްގެންކަމަށް ބެލެވުނު ނަމަވެސް, އެ ޙަމަލާގައި ބޭނުން ކޮށްފައި ވަނީ ކޮން ހަތިޔާރެއްކަން ކަށަވަރު ކުރެވިފައެއް ނުވެއެވެ. މި ޙަމަލާގައި ޔަހޫދީ ފައުޖުން ވަނީ ހަނިއްޔާގެ އިތުރުން އޭނާގެ ހަށިފާރަވެރިޔާވެސް ޝަހީދު ކޮށްލާފައެވެ.

ދުނިޔޭގެ އެކި ކަންކޮޅުތަކުން ދަނީ ހަނިއްޔާ ޝަހީދު ކޮށްލުން ކުށްވެރި ކުރަމުންނެވެ. ހުޅަނގު އައްސޭރީގައި ވެރިކަން ކުރާ ޕަލަސްޓީނިޔަން އޮތޯރިޓީ، ޕީއޭގެ ރައީސް މަޙްމޫދު ޢައްބާސް އެކަން ކުށްވެރި ކުރައްވައި, ފަލަސްޠީނުގެ މުސްލިމުން އެއްބައިވަންތަކަން އިސްކޮށް އެކަތިގަނޑަކަށް ވުމަށް ގޮވައިލެއްވިއެވެ.

ޔަހޫދީންގެ ޙަމަލާއަކީ ވަރަށް ފިނޑި އަމަލެއްގެ ގޮތުގައި ސިފަކުރައްވައި ޢައްބާސް ވިދާޅުވީ، ހަނިއްޔާ އަވަހާރަ ކޮށްލުމާ ގުޅިގެން މަސްރަޙު އިތުރަށް ނުރައްކާތެރިވެފައިވާ ކަމުގައެވެ.