ވިނަރެސް ފްލެތް ކައިރީގައި ހިނގި އެކްސިޑެންޓްގައި އަނިޔާ ލިބުނު މީހާގެ ކަނދުރާ އަދި މައިބަދައިގައި ރެނދުލާފައިވާ ކަމަށް ފުލުހުން ބުނެފިއެވެ.

މިމައްސަލާގައި ހައްޔަރުކޮށްފައިވާ މީހުންގެ ބަންދާއި މެދު ގޮތެއް ނިންމުމަށް ކޯޓަށް ހާޒިރު ކުރިއިރު، ފުލުހުން ތައްޔާރުކޮށް ހުށަހަޅާފައިވާ ރިޕޯޓްގައި ބަޔާންކޮށްފައިވާ ގޮތުގައި އޭނާގެ ކަނދުރާ އަދި މައިބަދައިގައި ރެނދުލާފައިވާ ކަމަށް ބުނެފައިވެއެވެ.

މިއެކްސިޑެންޓްގައި އަނިޔާވި ޒުވާނާއަށް އައިޖީއެމްއެޗްގައި ފަރުވާދެމުންދާއިރު އޭނާގެ ހާލު ސީރިއަސް ކަމަށް ފުލުހުން ބުނެފައިވެ އެވެ.

Advertisement

މީގެއިތުރުން، އަނިޔާ ލިބުނު މީހާ އެކްސިޑެންޓްވެ ގޮސް ފުރަތަމަ ޖެހުނީ ކަނދުރާ ކަމަށާއި ކަނދުރާގައި ރެދުލާފައިވާއިރު، މައިބަދައިގައިވެސް ރެދުލާ، ބޯ ފަޅައިގެން ގޮސްފައިވާ ކަމަށްވެސް ފުލުހުން ހުށަހަޅާފައިވާ ރިޕޯޓްގައި ބަޔާންކޮށްފައިވާ ގޮތުގައި ބުނެފައި ވެއެވެ.

ހުޅުމާލެ ވިނަރެސް ފްލެޓް ކައިރީގައި އިއްޔެ މިއެކްސިޑެންޓް ހިންގާފައި ވަނީ ބާރު ސްޕީޑްގައި ދުއްވާފައި އައި ކާރެއް ކޮންޓްރޯލް ނުވެގެން ގޮސް، ވިނަރެސް ފްލެޓް ކުރިމަތީގައި ޕާކުކޮށްގެން އިން ސައިކަލެއްގައި ޖެހި އެވެ. ކާރު އައިސް ސައިކަލުގައި ޖެހުނުލެއް ބާރު ކަމުން ސައިކަލުގައި އިން ޒުވާނާ ދިޔައީ ވިއްސައިގެންނެވެ.

އެވަގުތު ކާރުގައި އިން ތިން މީހުންގެ ތެރެއިން ދެމީހަކު ފިލުމުން ފުލުހުން ވަނީ އެމީހުން ހޯދުމަށް އިއުލާން ކޮށްފައެވެ. ނަމަވެސް ރޭގެ ވަގުތެއްގައި ކޯޓު އަމުރެއްގެ ދަށުން އެދެމީހުން ވެސް ވަނީ ހައްޔަރުކޮށް ފުލުހުންގެ ބެލުމުގެ ދަށަށް ގެނެސްފައެވެ. އަނެއް މީހާ އެކްސިޑެންޓްވީ ވަގުތު އެތަނުން ފުލުހުން ވަނީ ހައްޔަރުކޮށްފައެވެ.

ކާރުގައި ތިބި ތިން މީހުން ހައްޔަރު ކުރުމަށްފަހު ފުލުހުން ވަނީ އެމީހުންގެ ވަނަވަރު ރޭގައި އެކްސްގައި ހިއްސާ ކޮށްފައެވެ. އެގޮތުން މިމައްސަލާގައި ހައްޔަރު ކޮށްފައިވަނީ ކ. މާލެ، ހ. ނޫރަންމާގެއާގެ/ އިކްރާމުއްރަހްމާން، ކ. މާލެ، މ. ލޭންޑްއޮފްގާރޑްން/ އިބްރާހީމް އިކްރާމް އަދި ގއ. ކަނޑުހުޅުދޫ، އާޒާދުގެ/ ޖިނާހް އިސްމާޢީލް އެވެ.

ކޯޓުން ވަނީ މީގެން ދެމީހަކު ޝަރީޢަތް ނިމެންދެން ބަންދު ކުރުމަށް އަމުރުކޮށްފައެވެ. އަދި ތިން ވަނަ މީހާގެ ބަންދަށް 15 ދުވަސް ޖަހާފައިވާއިރު ބަންދަށް ލުޔެއް ދިނުމަށް ފުރަތަމަ ދެމީހުންގެ ފަރާތުން ކޯޓުގައި ވަނީ އެދިފައެވެ.