ބެންކް އޮފް މޯލްޑިވްސް (ބީއެމްއެލް) އިން ޕޭރޯލް އާއި ބަލްކް ޓްރާންސްފާ އިންޓަނެޓް ބޭންކިން އާއި ފަވަރަ މެދުވެރިކޮށް ހެދުން ވަގުތީ ގޮތުން މެދުކަނޑާލައިފި އެވެ.

ބީއެމްއެލްއިން މިރޭ ބުނީ ބީއެމްއެލްގެ އިންޓަނެޓް ބޭންކިންއާއި މޯލްޑިވްސް އިސްލާމިކް ބޭންކުގެ ފަވަރަ މެދުވެރިކޮށް ޕޭރޯލް އަދި ބަލްކް ޓްރާންސްފާގެ ޚިދުމަތް ވަގުތީ ގޮތުން ހުއްޓާލާފައިވާ ކަމަށެވެ.

އަދި ބޮޑެތި އަދަދުތަކުން ކުރާ ޓްރާންސްފާތަކާއި އަދި ޕޭރޯލް ޕްރޮސެސްކުރަން [email protected] އަށް މެއިލް ކުރުމަށް އެ ބޭންކުން ވަނީ އެދިފަ އެވެ.

Advertisement

ބީއެމްއެލުން މިގޮތަށް ނިންމާފައިވަނީ މިދިޔަ ބުރާސްފަތި ދުވަހު އޮޅިގެން ލިލީ ބީޗް ރިސޯޓުގެ ބައެއް މުވައްޒަފުންނަށް މުސާރައިގެ ގޮތުގައި ބޮޑު އަދަދުތަކުން ފައިސާ ޖަމާކުރެވިފައި ވަނިކޮށެވެ. އެއީ ޕޭރޯލް ޕްރޮސެސިންގެ ބަލްކް ޕޭމަންޓަށް މި ފަހުން ގެނައި ބަދަލަކާ ގުޅިގެން ދިމާވީ ކަމެއް ކަމަށާއި އެ ފައިސާ އަނބުރާ ހޯދާފައިވާ ކަމަށް ބީއެމްއެލް އިން ވަނީ ބުނެފަ އެވެ.