އިނގިރޭސިވިލާތުގައި ހިނގަމުންދާ ހަމަނުޖެހުންތަކާއި ގުޅިގެން އެގައުމަށް ދަތުރުކުރާ ދިވެހީން ސަމާލުވުމަށް ފޮރިން މިނިސްޓްރީން އިލްތިމާސްކޮށްފިއެވެ.

ފޮރިން މިނިސްޓްރީން މިއަދު ނެރެފައިވާ ނޫސް ބަޔާނެއްގައި ބުނެފައިވާ ގޮތުގައި، އިނގިރޭސި ވިލާތުގެ ހުޅަނގު އުތުރުގައި ހިމެނޭ ސައުތުޕޯޓުގައި ކުޑަކުދިންނަށް ނެށުމާ، ޔޯގާ ދަސްކޮށްދޭ ކްލާހަކަށް ވަދެ ތިން ކުއްޖަކަށް ވަޅިން ދިން ހަމަލާގައި އެކުދިން މަރުވުމާއި ގުޅިގެން އެ ގައުމުގައި މުސްލިމުންނާ ދެކޮޅަށް ހިންގާ ސިލްސިލާ މުޒާހަރާތަކާ، ހަރަކާތްތައް ހައި ކޮމިޝަނުން ބަލަމުން އަންނަ ކަމަށެވެ.

މިއާއިއެކު މިފަދަ ހާލަތެއްގައި އިނގިރޭސިވިލާތުގައި ދިރިއުޅޭ ދިވެހިންނާ، އެ ގައުމަށް ދަތުރުކުރާ ދިވެހިން އަދި ވަކިން ހާއްސަކޮށް ސައުތުޕޯޓް އަދި އެ ތަނުގެ ވަށައިގެންވާ ސަރަޙައްދުތަކުގައި ދިރިއުޅޭ މީހުން މިކަންކަމަށް އިތުރަށް ސާމާލުކަން ދިނުމަށް އެމިނިސްޓްރީން ވަނީ އެދިފައެވެ.

Advertisement

ޚާއްސަ ގޮތެއްގައި އަމާންކަން ގެއްލިފައިވާ ސަރަހައްދުތަކާ ދުރުވެ، އެ ސަރަހައްދުގެ ކަމާބެހޭ އިދާރާތަކުން ދޭ ހުރިހާ އިރުޝާދަކަށް ފުރިހަމައަށް ތަބާވުމަށް މިނިސްޓްރީން ވަނީ އަންގާފައެވެ. މީގެ އިތުރުން މިހާރު ހިނގަމުންދާ ހަމަނުޖެހުންތަކާ ގުޅިގެން އެހީތެރިކަން ބޭނުންވެއްޖެ ހާލަތެއްގައި އިނގިރޭސި ވިލާތުގައި ހުންނަ ރާއްޖޭގެ ހައިކޮމިޝަންގެ ނަންބަރަށް ގުޅުމަށްވެސް އެމިނިސްޓްރީން ވަނީ އެދިފައެވެ.

އިނގިރޭސިވިލާތުގައި މިހާރު ހިނގަމުންދާ ހަމަނުޖެހުމަކީ ޑާންސް އަދި ޔޯގާ ދަސްކޮށްދޭ ތަނަކަށް މީހަކު ވަދެ ދިން ހަމަލާއެއްގައި އުމުރުން ހަ އަހަރާއި ހަތް އަހަރު އަދި ނުވަ އަހަރުގެ ކުއްޖެ މަރުވުމާއި ގުޅިގެން އެގަމުރުގެ ރައްޔިތުން ކުރަމުން އަންނަ ހަރުތާލު ތަކެކެވެ. މިހާދިސާގައި ތިން ކުދިން މަރުވެފައިވާއިރު، އިތުރު ކުދިންނަށް އެކި ޒަހަމްތައް ވަނީ ލިބިފައެވެ. އަދި އެކުދިންނަށް ހޮސްޕިޓަލުގައި ފަރުވާ ދެމުންދާއިރު، މި ކުދިންނަށް އިންސާފު ހޯދާ ދިނުމަށް ގޮވާލާ އެ ގައުމުގައި އަންނަނީ މުޒާހަރާކުރަމުންނެވެ.