ރާއްޖޭގެ ކޮންމެ ރައްޔިތަކަށް ވެސް ވިނަރެސް ފްލެޓަށް އެދި ހުށަހެޅުމުގެ ފުރުސަތު ހުޅުވާލާފައި ވާކަމަށް ބުނެ ދައުރު ކުރާ މެސެޖަކީ ފޭކު މެސެޖެއް ކަމަށް ފުލުހުން މިއަދު ބުނެފިއެވެ.

ފުލުހުން މިއަދު ހާމަކޮށްފައިވާ ގޮތުގައި މި މެސެޖު ދައުރުކުރަނީ ވިނަރެސް ފްލެޓަށް އެދި ހުށަހެޅުމުގެ ފުރުސަތު ހައުސިން ޑިވަލޮޕްމެންޓް ކޯޕަރޭޝަން (އެޗްޑީސީ)ން ހުޅުވާލައިފައިވާ ކަމަށްބުނެ، ލިންކެއް ހިމެނޭ ގޮތަށް ކަމަށެވެ.

ފުލުހުން ވަނީ މިލިންކު މެދުވެރިކޮށް ފޭސްބުކް އަދި އިންސްޓަގްރާމް ހެކުކޮށް، ފްރެންޑް ލިސްޓުގައިވާ ފަރާތްތަކުގެ އަތުން ފައިސާ ހޯދަމުންދާކަމަށާއި މިފަދަ ލިންކުތަކަށް ސަމާލުވުމަށް އެދިފައެވެ.

Advertisement

ސްކޭމްގެ މައްސަލަތައް ރާއްޖޭގައި އާންމުވެފައިވާއިރު، ސަރުކާރުގެ އެކި ކުންފުނިތަކުގެ ނަމުގައި ވެސް ދަނީ ސްކޭމް މެސެޖުތައް ދައުރުކުރަމުންނެވެ.

ފުލުހުން މީގެ ކުރިން ހާމަކޮށްފައިވާ ގޮތުގައި ހުސްވި އަހަރުގެ ތެރޭގައި އޮޅުވާލައިގެން ފައިސާ ހޯދުމުގެ 1،661 މައްސަލައެއް ފުލުހަށް ރިޕޯޓުކޮށްފައިވާއިރު، އެ ސްކޭމްތަކުން 20 މިލިއަން ރުފިޔާ ވަނީ ގެއްލިފައެވެ.