ބަންގްލަދޭޝްގައި ވަޒީފާގެ ކޯޓާއާ ގުޅިގެން ކުރަމުން އަންނަ މުޒާހަރާ ހޫނުވެ، އެގައުމުގައި ކާފިއު އިއުލާންކޮށްފި އެވެ.

ބަންގްލަދޭޝްގެ މިނިވަން ކަމަށް ކުރި ހަނގުރާމައިގައި ބައިވެރިވި އެގައުމުގެ ސިފައިންގެ އާއިލާތަކަށް ސަރުކާރުގެ ވަޒީފާތަކުގެ 30 ޕަސެންޓު ދޭން ނިންމުމާ ގުޅިގެން ކުރަމުން އައި މުޒާހަރާތައް މެދުކަނޑާލުމަށްފަހު އަލުން އިއްޔެ ފެށީ ބަންގްލަދޭޝްގެ ބޮޑުވަޒީރު ޝައިހް ހަސީނާގެ އިސްތިއުފާ ދިނުމަށާއި އަދި މުޒާހަރާގައި މަރުވި މީހުންނަށް އިންސާފު ހޯދައިދިނުމަށް ގޮވާލަމުންނެވެ. މުޒާހަރާތައް ފެށުމާއެކު އިއްޔެ ވަނީ ވަރުގަދަ ކުރިމަތިލުންތަކެއް މުޒާހަރާގެ ބައިވެރިންނާއި ފުލުހުންނާއި ދެމެދު ހިނގާފަ އެވެ.

ރިޕޯޓުތައް ބުނާގޮތުން މި ކުރިމަތިލުންތަކުގައި މަރުވި މީހުންގެ އަދަދު ގާތްގަނޑަކަށް 100 އާއި ގާތް ކުރެ އެވެ. މަރުވި މީހުންގެ ތެރޭގައި 13 ފުލުހަކު ވެސް ހިމެނެ އެވެ.

Advertisement

މި ހަމަނުޖެހުންތަކާއި ގުޅިގެން ބަންގްލަދޭޝްގެ އިންޓީރިއާ މިނިސްޓްރީން ވަނީ އިއްޔެ ހަވީރުން ފެށިގެން މުޅި އެގައުމުގައި ކާފިއު އިއުލާންކޮށްފަ އެވެ. އަދި މިއަދުން ފެށިގެން ތިން ދުވަސް ވަންދެން ސަރުކާރު ބަންދުކުރަން ވެސް ވަނީ ނިންމާފަ އެވެ.

ބަންގްލަދޭޝްގައި ކާފިއު އިއުލާންކޮށްފައިވާއިރު، އިންޓަނެޓުގެ ހިދުމަތް ވެސް މިހާރު ވަނީ ކަނޑާލާފަ އެވެ. އަދި ސޯޝަލް މީޑިއާގެ ބައެއް ޕްލެޓްފޯމުތައް ކަމަށްވާ ފޭސްބުކް އާއި ވަޓްސްއެޕް ވެސް ބޭނުން ނުކުރެވޭ ގޮތް ވަނީ ހަދާފަ އެވެ.

މުޒާހަރާތަކާ ގުޅިގެން ހަސީނާ ވަނީ މުޒާހަރާ ލީޑްކުރާ މީހުންނާއި ބައްދަލުކުރަން ވެސް މަސައްކަތްކޮށްފަ އެވެ. ނަމަވެސް މުޒާހަރާ ކުރާ ފަރާތްތަކުން ވަނީ މަޝްވަރާގެ ބަދަލުގައި ބޭނުން ވަނީ ހަސީނާ މަގާމުން އިސްތިއުފާ ދިނުމަށް ކަމަށް ބުނެފަ އެވެ.