މޫސުން ގޯސްވުމުގެ ސަބަބުން ކަނޑު ގަދަވެ ކަނޑުމަތީގައި ހަ ހާދިސާއެއް ހިނގައިފިއެވެ.

މޯލްޑިވްސް ނޭޝަނަލް ޑިފެންސް ފޯސް އިން ހާމަކޮށްފައިވާ ގޮތުގައި މޫސުން ގޯސްވެ ކަނޑުގަދަވުމުގެ ސަބަބުން ކަނޑުމަތީގެ ތިން ހާދިސާއަކާއި ގުޅިގެން އެމްއެންޑީއެފް ސެންޓްރަލް އޭރިއާ ކޮމާންޑް، ކޯސްޓްގާޑް ތާޑް ސްކޮޑްރަންއިން ދަނީ ހަރަކާތްތެރިވަމުންނެވެ.

އެމެއެންޑީއެފް އިން ހާމަކޮށްފައިވާ ގޮތުގައި ކަނޑުމަތީގެ ހަ ހާދިސާއެއް ރޭގެ ވަގުތެއްގައި ކޯސްޓްގާޑަށް ރިޕޯޓް ކޮށްފައިވާ ކަމަށެވެ.

ރޭގައި ކޯސްޓްގާޑަށް ރިޕޯޓް ކޮށްފައިވާ ކަނޑުމަތީގެ ހާދިސާތަކުގެ ތެރޭގައި ނުވަ ފަތުރުވެރިންނާ އެކު ދަތުރުކުރި ސަފާރީއެއް ދިޔަވެ ތިމަރަފުށި ފަރަށް ވަނީ އަރައިފައެވެ. މިހާދިސާގައި ތިމަރަފުށީ ފުލުހުން އަންނަނީ ހަރަކާތްތެރިވަމުންނެވެ.

މީގެއިތުރުން، ހިތަދޫ މަސް ދޯންޏެއް އިންޖީނު ހުއްޓިގެން ވެސް ކޯސްޓްގާޑަށް ވަނީ ރިޕޯޓް ކޮށްފައެވެ. މި ހާދިސާގައި ސިފައިން ހަރަކާތްތެރިވެފައި ނުވާނެ ކަމަށް އެމްއެންޑީއެފް ހާމަކޮށްފައިވެއެވެ.

އެމްއެންޑީއެފް އިން މައުލޫމާތު ދީފައިވާ ގޮތުގައި އެމްއެންޑީއެފް އިން ވަނީ  14 މީހުންނާއެކު ދަތުރުކުރި ސައުތު އެކްސްޕްރެސް ދޯނި ދިޔަވާތީވެސް އެހީތެރިވެދީފަ އެވެ. އަދި ސިފައިންގެ އެހީތެރިކަމާއިއެކު މިދޯނި ވަނީ މިއަދު ހެނދުނު 9:00 ހާއިރު ލ.މާމެންދޫ ބަނދަރަށް ވައްދާފައެވެ.

މީގެއިތުރުން، 80 ފޫޓްގެ ފާގަތި ނަމަކަށް ކިޔާ ދޯންޏަށް ދިޔަވާތީ ސެންޓްރަލް އޭރިއާ ކޮމާންޑް ދ.ކުޑަހުވަދޫ ޕޯސްޓްގެ ސިފައިން ހަރަކާތްތެރިވެފައިވާ ކަމަށް ވެސް އެމްއެންޑީއެފް އިން ބުނެފައިވެއެވެ. މިހާދިސާގައި އެދޯނީގައި މަސައްކަތް ކުރާ ބިދޭސީއަކަށް އަނިޔާވެފައިވާ ކަމަށާއި އޭނާއަށް ފަރުވާ ދިނުމަށް ސެންޓްރަލް އޭރިއާ ކޮމާންޑް ކޯސްޓްގާޑް ތާޑް ސްކޮޑްރަންގެ އެހީތެރިކަމާއެކު ފ.ނިލަންދޫ ހޮސްޕިޓަލަށް ގެންގޮސްފައިވާ ކަމަށް ވެސް އެމްއެންޑީއެފް އިން ބުނެފައިވެއެވެ.

އަދި މިނާ ނަމަކަށް ކިޔާ ދޯންޏެއްގެ އިންޖީނު ހުއްޓިގެން ވެރިފަރާތުން ހަމަޖެއްސި ދޯންޏެއްގެ ކަފުގައި ދަތުރުކުރަމުންދާ ކަމަށް ވެސް އެމްއެންޑިއެފް އިން ހާމަކޮށްފައިވެއެވެ.

ރޭގައި އެކަނިވެސް ކަނޑުމަތީގެ 6 ހާދިސާއެއް ހިނގާފައިވާއިރު، މޫސުމާއި ބެހޭ ގައުމީ އިދާރާއިން ވަނީ ރާއްޖޭގެ ކަނޑުތައް އާދައިގެ ވަރަކަށް ގަދަވެފައި ވިލާގަނޑުގައި ގަދަވާނެ ލަފާކޮށް ބުނެފައިވެއެވެ.

އެއިދާރާއިން ހާމަކޮށްފައިވާ ގޮތުގައި މިއަދު ރާއްޖޭގެ އެކި ވިއްސާރަކޮށް ގުގުރާނެ ކަމަށާއި ބައެއް ރަށްތަކަށް ބޯކޮށް ވާރޭ ވެހޭނެ އެވެ. އަދި ވައި ހުންނާއި ދެކުނުގެ އަތޮޅުތަކަށް، ދެކުނާއި ހުޅަނގު ދެކުނުން، އަދި އެހެން ހިސާބުތަކަށް ހުޅަނގާއި ހުޅަނގު އުތުރުން، ގަޑިއަކު އަށް މޭލާއި 18 މޭލާ ދެމެދުގެ ބާރުމިނުގައި ކަމަށާއި ވިލާގަނޑުގައި ގަޑިއަކު ގާތްގަނޑަކަށް 40 މޭލަށް ވައިގަދަވުން އެކަށީގެންވާ ކަމަށް އެއިދާރާއިން ބުނެފައިވެއެވެ.