ޒަމާނީ މަރުކަޒީ ބޭންކަކަށް މޯލްޑިވްސް މަނިޓަރީ އޮތޯރިޓީ، އެމްއެމްއޭ ހެދުމަށް އެ ބޭނުންކުގެ އޮނިގަނޑަށް ބަދަލުތައް ގެނެސްފިއެވެ.

އެމްއެމްއޭގެ އޮނިގަނޑަށް ގެނައި ބަދަލާއެކު އެ އޮތޯރިޓީގެ އެސިސްޓެންޓް ގަވަރުނަރުގެ މަގާމު ވަނީ މެނޭޖިން ޑިރެކްޓަރުގެ މަގާމަށް ބަދަލުކޮށްފައެވެ. އަދި މިހާރު ތިއްބެވި އެސިސްޓެންޓް ގަވަރުނަރުން ވަނީ އެޑްވައިޒަރުންގެ މަގާމަށް ޕްރޮމޯޓްކޮށްފައެވެ.

ތަޢުލީމީ އަދި ތަޖުރިބާކާރު ފަރާތްތަކަށް ފުރުޞަތު ފުޅާކުރުމުގެ ގޮތުން އެމްއެމްއޭއިން ވަނީ އަލަށް އުފައްދާ މެނޭޖިން ޑިރެކްޓަރުންގެ މަގާމަކީ ފަސް އަހަރުގެ ދެ ދައުރަކަށް ހޮވާ މަގާމުތަކަށް ބަދަލުކޮށްފައެވެ. އެ މަގާމުތަކަށް ކުރިމަތިލުމުގެ ފުރުސަތު އެމްއެމްއޭގައި މަސައްކަތްކުރާ މުވައްޒަފުންގެ އިތުރުން އާންމުކޮށްވެސް ހުޅުވާލާނެ ކަމަށް އެ އޮތޯރިޓީން މައުލޫމާތު ދެއްވައެވެ.

Advertisement

މީގެ އިތުރުން 5 ދާއިރާއަކުން 5 މެނޭޖިންގ ޑިރެކްޓަރުން އައްޔަންކުރާނެއެވެ. އޭގެ ސަބަބުން އެމްއެމްއޭގައި މިހާރު ތިބި ގާބިލު ފަރާތްތަކަށް އާ ފުރުޞަތުތައް ހުޅުވިގެންދާނެކަމަށް އެމްއެމްއޭއިން ވިދާޅުވެއެވެ.

އެމްއެމްއޭގެ ގަވަރުނަރުކަމުގެ މަޤާމަށް އަޙްމަދު މުނައްވަރު އައްޔަންކުރައްވާފައިވަނީ ޖުލައި މަހުގެ 31 ވަނަ ދުވަހުއެވެ. މަޤާމަށް އައްޔަންކުރެއްވުމާއި ގުޅިގެން ރައީސުލްޖުމްހޫރިއްޔާއާއެކު ބޭއްވި ބައްދަލުކުރެއްވުމުގައި ގަވަރުނަރު ވަނީ ޤައުމުގެ އިޤްތިޞާދު ކުރިއެރުވުމަށް ސަރުކާރުން ކުރައްވާ މަސައްކަތްތަކަށް ފުރިހަމައަށް އެއްބާރުލުން ދެއްވާނެކަމަށެވެ.