އޮލިމްޕިކް ގޭމްސްގެ ފިރިހެނުންގެ ފުޓްބޯޅަ އިވެންޓުގެ ފައިނަލަށް ފްރާންސް އާއި ސްޕެއިން ދަތުރުކޮށްފި އެވެ.

ބާރާތް ބާއްވާ ފްރާންސް ފައިނަލަށް ދަތުރުކުރީ ސެމީފައިނަލްގައި ރޭ މިސްރާއި ބައްދަލުކޮށް 3-1 އިން މޮޅުވެގެންނެވެ.

ފޯރިގަދަ ކުޅުމެއް ފެނިގެންދިޔަ މި މެޗުގެ ފުރަތަމަ ހާފުގައި ގޯލެއް ފެނިގެން ގޮސްފައި ނުވާއިރު، މެޗުގެ 62 ވަނަ މިނެޓްގައި މަހުމޫދު ސަބޭރް ވަނީ މިސްރަށް ލީޑު ނަގައިދީފަ އެވެ. މި ގޯލާއެކު ފްރާންސުން ވަރަށް ބޮޑަށް ކުރިއަށް ޖެހިލައިގެން ކުޅުނުއިރު، މެޗުގެ 82 ވަނަ މިނެޓްގައި ޖިއާން ފިލިޕޭ މަޓޭޓާ ވަނީ ފްރާންސަށް ނަތީޖާ އެއްވަރުކޮށްދީފަ އެވެ.

Advertisement

މެޗުގެ 90 މިނެޓްގެ ކުޅުން ނިމުނުއިރު ދެ ޓީމު ވެސް އެއްވަރުވެފައި އޮތުމުން ދެން ކުޅުނީ އިތުރު ވަގުތުގެ ދެ ހާފެވެ. އެގޮތުން އިތުރު ވަގުތުގެ ފުރަތަމަ ހާފްގެ ކުރީކޮޅު މިސްރުގެ އުމަރު ފަޔެދަށް ރަތްކާޑު ދެއްކިއިރު، އޭގެ އިރުކޮޅެއްފަހުން މަޓޭޓާ ވަނީ ފްރާންސަށް ލީޑު ނަގައިދީފަ އެވެ. އަދި މި މެޗުގައި ފްރާންސުން ޖެހި ތިންވަނަ ގޯލު ކާމިޔާބުކޮށްދިނީ އިތުރު ވަގުތުގެ ދެވަނަ ހާފްގެ ކުރީކޮޅު މައިކަލް އޮލީސޭ އެވެ.

އެންމެފަހުން ބޭއްވި އޮލިމްޕިކް ގޭމްސްގައި ރިހި މެޑަލް ހޯދި ސްޕެއިނުން ފައިނަލަށް މިފަހަރު ދަތުރުކުރީ މޮރޮކޯ 2-1 އިން ބަލިކޮށްގެންނެވެ.

މި މެޗުގައި ފެނިގެންދިޔަ ފުރަތަމަ ގޯލު ކާމިޔާބުކުރީ މޮރޮކޯ އިން ކަމަށްވާއިރު، މެޗުގެ 37 ވަނަ މިނެޓްގައި ލިބުނު ޕެނަލްޓީއަކުން މޮރޮކޯ އަށް ލީޑު ނަގައިދިނީ ސުފިއާން ރަހީމީ އެވެ. ނަމަވެސް މެޗުގެ 65 ވަނަ މިނެޓްގައި ފާމިން ލޮޕޭޒް ސްޕެއިނަށް ނަތީޖާ އެއްވަރުކޮށްދިން އިރު، މި މެޗުން ސްޕެއިން މޮޅުވި ގޯލު މެޗު ނިމެން ފަސް މިނެޓަށް ވެފައިވަނިކޮށް ކާމިޔާބުކޮށްދިނީ ހުއާންލޫ ސަންޗޭޒް އެވެ.

ފްރާންސް އާއި ސްޕެއިން ބައްދަލުކުރާ ފައިނަލް މެޗު އޮންނާނީ ހުކުރު ދުވަހު އެވެ.