ރަޝިޔާއިން ޑްރޯން ހަމަލާތައް ދެމުންދާއިރު، ޔޫކްރޭންގެ ރައީސް ވޮލޮޑިމިއާ ޒެލެންސްކީގެ އުފަން ރަށަށް ދިން މިސައިލް ހަމަލާއެއްގައި ހަ މީހުން މަރުވެ 75 މީހުން ޒަހަމްވެއްޖެ އެވެ.

މިސައިލްތަކެއް މިދިޔަ ހޯމަ ދުވަހު ވަނީ ޑްނިޕްރޮޕެޓްރޯވްސްކްގެ އިރުމަތީ ސަރަހައްދުގެ ކްރިވިއީ ރިހްގައި ހުންނަ ރެސިޑެންޝަލް ކޮމްޕްލެކްސްއަކާއި ޔުނިވާސިޓީ އިމާރާތަކަށް ވަނީ އަމާޒުވެފައެވެ. ރީޖަނަލް ގަވަރުނަރު ވިދާޅުވީ ޝިކާރައަކަށް ވެފައިވާ މީހުންގެ ތެރޭގައި ކުޑަކުއްޖަކު ވެސް ހިމެނޭ ކަމަށެވެ.

ޒެލެންސްކީ ވަނީ ހަލާކުވެފައިވާ އިމާރާތްތަކުގެ ފޫޓޭޖް ސޯޝަލް މީޑިއާގައި އާންމުކޮށްފަ އެވެ. އޭނާ ލިޔުއްވާފައިވާ ގޮތުގައި "ޔޫކްރޭންގެ ސަރަހައްދުތަކަށް ބޮން އަޅަމުންދަނީ ހިސާރުކުރާ ގައުމުތަކުން ކަމަށާއި، އެމީހުން ކުރިއަށް ގެންދަނީ ސުލްހަވެރި ސިޓީތަކާއި ރައްޔިތުންނަށް ބިރުދައްކައިގެން" ކަމަށެވެ.

Advertisement

މި ހަމަލާ ދީފައިވަނީ މޮސްކޯ އާއި އެގައުމުގެ އެހެން ހިސާބުތަކުގައި ޑްރޯން ހަމަލާތަކާ ދެކޮޅަށް ރަޝިޔާއިން ދޭ އެލާޓް ވަރުގަދަ ކުރަމުން ދަނިކޮށެވެ. ޒެލެންސްކީ ހުކުރު ދުވަހު ވިދާޅުވީ "މަޑުމަޑުން ހަނގުރާމަ އެނބުރި އަންނަނީ ރަޝިޔާގެ ސަރަހައްދަށް" ކަމަށެވެ.

ޔޫކްރޭންގެ ވައިގެ ސިފައިންގެ ތަރުޖަމާނު ޔޫރީ އިހްނާޓް ވެސް ވިދާޅުވީ "ރަޝިޔާގެ އިތުރުން މޮސްކޯގައި ވެސް އަބަދުވެސް އެއްޗެއް އުދުހެނީ. މިހާރު ހަނގުރާމައިގެ އަސަރު ކުރަމުންދަނީ ކަންބޮޑު ނުވި މީހުންނަށް" ކަމަށެވެ.

ރަޝިޔާގެ ސަލާމަތީ މަޖިލީހުގެ ސެކްރެޓަރީ ނިކޮލައި ޕަޓްރޫޝެވް ހޯމަ ދުވަހު ވިދާޅުވެފައި ވަނީ ހުޅަނގުގެ ތާއީދާއެކު ވައިގެ މަގުން މޮސްކޯ، ކްރައިމިއާ އަދި އެހެނިހެން ސަރަހައްދުތަކަށް ޔޫކްރޭންގެ ސަލާމަތީ އިދާރާތަކުން ގިނަ އަދަދެއްގެ ޑްރޯން ހަމަލާތައް ދެމުންނެވެ. ޕަޓްރޫޝެވް އަކީ ރައީސް ވްލަޑިމިއާ ޕޫޓިންގެ ގާތް އެހީތެރިއެކެވެ.

އަދި ހޯމަ ދުވަހު ވެސް ރަޝިޔާގެ ޑިފެންސް މިނިސްޓަރު ސާގޭ ޝޮއިގޫ ވަނީ އަސްކަރީ ކޮމާންޑަރުންނާ އެކު ބޭއްވި ކޮންފަރެންސް ކޯލެއްގައި ޔޫކްރޭނަށް ހަނގުރާމައިގެ މައިދާނުގައި ލިބުނު ގެއްލުންތަކަށް އިޝާރާތް ކުރައްވާފަ އެވެ. އޭނާ ވިދާޅުވީ ފާއިތުވި މަހެއްހާ ދުވަހުގެ ތެރޭގައި ޔޫކްރޭންގެ އަސްކަރިއްޔާއަށް 10 ލިއޮޕާޑް ޓެންކް ހިމެނޭ ގޮތަށް 20،800 އަށް ވުރެ ގިނަ ސިފައިންނާއި ސާމާނު ގެއްލިފައިވާ ކަމަށެވެ.

ޝޮއިގޫ ވިދާޅުވީ ޔޫކްރޭންގެ ބާރުތަކުން މަދަނީ އިންފްރާސްޓްރަކްޗާއަށް "ޓެރަރިސްޓް ހަމަލާތަކެއް" ދެމުން ގެންދަނީ އެ ސިފައިންގެ ކައުންޓަރ އޮފެންސިވްގައި އޭނާ ވިދާޅުވި ގޮތުގައި ނާކާމިޔާބުވި ކަންކަން ފުއްދުމަށް ކަމަށެވެ.