މުޑުދާރުކޮށް ހުރި ގެއެއްގެ ތެރޭގައި ކާތަކެތި ތައްޔާރު ކުރާ ތިން ބިދޭސީއެއް މޯލްޑިވްސް އިމިގްރޭޝަންގެ ބެލުމުގެ ދަށަށް މިއަދު ގެންގޮސްފި އެވެ.

އިމިގްރޭޝަނުން ގާއިމްކޮށްފައިވާ "އިމިގްރޭޝަން ވޮޗް" އަށް ލިބުނު ރިޕޯޓަކާ ގުޅިގެން އިމިގްރޭޝަނުން މިއަދު ކުރިއަށް ގެންދިޔަ ރެއިޑް އޮޕަރޭޝަނެއްގައި މާލޭގައި ހުންނަ އެ ގެ ބަލައި ފާސްކުރުމަށް ފަހު ތިން ބިދޭސީން ހައްޔަރުކޮށްފައިވާ އިރު، އެގޭ ބަލާފާސް ކުރުމުން އާންމު ފިހާރަތަކުގައި ވިއްކަން ހުންނަ ގިނަ އަދަދެއްގެ ކާބޯތަކެތި އެ ގޭ ތެރެއިން ފެނިފައިވާ ކަމަށް އިމިގްރޭޝަނުން ބުނެފައިވެއެވެ.

އިމިގްރޭޝަނުން ބުނެފައިވާ ގޮތުގައި އެކަން ވަނީ މިހާރު ކަމާބެހޭ އިދާރާތަކުގެ ސަމާލުކަމަށް ގެނެސްފައެވެ.

Advertisement

އިމިގްރޭޝަނުން ވަނީ މިއޮޕަރޭޝަންގެ ފޮޓޯ އެކްސްގައި ހިއްސާ ކޮށްފައެވެ. އަދި ފޮޓޯތަކުން ފެންނަ ގޮތުގައި ބިދޭސީން ތައްޔާރުކުރަމުން ދިޔަ ތަކެތީގެ ތެރޭގައި ރިހާކުރު ގުޅަ އާއި ކުދިގުޅަ އާއި ތެލުލިފަތާއި ފޯއްޕެކެޓާއި ކިއްލި ޕެކެޓުކުގައި ހުރީ ފޫޖަހައިފަ އެވެ.

ކާތަކެތި ތައްޔާރު ކުރާ ތަނުގެ ތަނަށް ބަލާލުމުން މީހުންނަށް ދިރިނޫޅެވޭ ވަރަށް ތަން މުޑުދާރު ކަމާއި ތަނުގައި ހުރި ތަކެތި ވެސް ނުތާހިރު ކަން ފެނިގެންދެއެވެ.

އިމިގްރޭޝަނުން މިހާރު ހިނގަމުންދާ އިޕަރޭޝަންތަކުގައި ބިދޭސީން އިސްވެ ކާބޯތަކެތި ހަދަން ބޭނުންކުރާ ގެތަކާއި ފްލެޓްތައް ރެއިޑްކޮށް ނުގަވާއިދުން އުޅޭ ބިދޭސީން އިމިގްރޭޝަންގެ ބެލުމުގެ ދަށަށް ގެނެސްފައިވާ ކަން ފާހަގަކުރެވެއެވެ