ބަނގްލަދޭޝްގެ ވެރިކަން ކުރަމުން އައި ބޮޑުވަޒީރު ޝައިހް ހަސީނާ ހުންނެވި ގަނޑުވަރަށް މުޒާހަރާގެ ބައިވެރިން ވަދެ، ހަސީނާގެ ޒާތީ ތަކެތި ކަމަށްވާ ބްރާ އާއި ޖަންގިޔާ ވެސް ލޫޓުވާލައިފިއެވެ.

މި ހާދިސާ ހިނގީ ބަނގްލަދޭޝްގެ ވެރިރަށް ދާކާގައި ހުންނަ ބޮޑުވަޒީރުގެ ގަނޑުވަރަށް މުޒާހަރާކުރާ މީހުން ވަދެގެންނެވެ. މުޒާހަރާކުރި މީހުން ވަނީ ގަނޑުވަރުގެ ތެރެއަށް ވަދެ، އެތަނުގައި ހުރި ގިނަ އަދަދެއްގެ ތަކެތި ލޫޓުވާލާފައެވެ. އެތަކެތީގެ ތެރޭގައި ހަސީނާގެ ސޫޓު ކޭސްތަކާއި، ކުރެހުންތަކާއި، ފޮތްތަކާއި، ގޮނޑިތަކާއި، މޭޒުތަކާއި ސައި ޖޯޑުތަކާއި، ސާޅި އާއި ޓީވީތަކާއި އޭނާ ގެންގުޅެއްވި ބައެއް ޖަނަވާރުތަކާއި، ދޫނިތަކުގެ އިތުރުން ބައިވަރު މުދާތަކެއް ހިމެނެއެވެ.

މުޒާހަރާގެ ބައިވެރި އަކު ހަސީނާ ހުންނެވި ގަނޑުވަރުން ނެރުނު ގޮޑިއެއްގައި އިށީނދެގެން / ފޮޓޯ: މީސް މީޑިއާ

ބަންގްލަދޭޝް ގައި ހިންގަމުންދިޔަ މުޒާހަރާތަކާއި، ގުޅިގެން ޝައިޚް ހަސީނާ ވަނީ އޭނާގެ މަޤާމުން މިދިޔަ ހޯމަ ދުވަހު އިސްތިއުފާ ދެއްވުމަށްފަހު ޤައުމު ދޫކުރައްވައި ފިލާފައެވެ. އިސްތިއުފާ ދިން ސަބަބެއްގެ ގޮތުގައި ބުނެފައިވަނީ ޤައުމުގެ ސުލްހަމަސަލަސްކަން ދެމެހެއްޓުމަށް ކަމަށެވެ. 

ބަންގްލަދޭޝްގެ ބޮޑުވަޒީރުގެ މަޤާމަށް ޝައިޚް ޙަސީނާ އެންމެ ފުރަތަމަ އިންތިޚާބުވެވަޑައިގެންފައި ވަނީ 2009 ވަނަ އަހަރުގެ ޖަނަވަރީ މަހުގެ ތެރޭގައެވެ. އޭނާ އިސްތިޢުފާ ދެއްވާފައި ވަނީ ވިދިވިދިގެން ހަތަރުވަނަ ދައުރަކަށް އިންތިޚާބުވެވަޑައިގެންނެވިތާ ހައެއްކަ މަސްދުވަސް ފަހުންނެވެ. 170 މިލިޔަން މީހުންގެ އާބާދީއެއް އޮންނަ ބަންގްލަދޭޝްގެ ސަރުކާރާ ދެކޮޅަށް ކުރަމުންދާ މުޒާހަރާތަކުގެ އަޑީގައި ތިބީ އިދިކޮޅު ޕާޓީތައް ކަމުގައި ޝައިހް ހަސީނާ ވަނީ ތުހުމަތު ކުރައްވައެވެ.