ހުޅުމާލޭގައި މަސް ބަންދުކުރާ ފެސިލިޓީއެއް ހަދަން ނިންމައިިފި އެވެ.

މިކަމާ ގުޅޭ ގޮތުން ފިޝަރީޒް މިނިސްޓްރީގެ ޑިރެކްޓަ ޖެނެރަލް ޑރ. ހުސައިން ސިނާން ދައުލަތުގެ މީޑިއާ، ޕީއެސްއެމްގައި ވިދާޅުވީ ކުދި އަދި މެދުފަންތީގެ ވިޔަފާރިތަކަށް ހާއްސަކޮށްގެން މަސް އެކްސްޕޯޓް ކުރުމަށްޓަކައި ކުޑަ ޕެކިން ފެސިލިޓީއެއް ހުޅުމާލޭގައި އެޅުމަށް ނިންމާފައިވާ ކަމަށެވެ.

އޭނަ ވިދާޅުވީ އެ ފެސިލިޓީ އެޅުމަށްޓަކައި ބޭނުންވާ ފައިސާ އިސްލާމިކް ޑިވެލޮޕްމަންޓް ބޭންކް އިން ހަމަޖެއްސުމުގެ މަސައްކަތް ކުރަމުން އަންނަ ކަމަށެވެ.

Advertisement

ސިނާނު ވިދާޅުވި ގޮތުގައި ހަދާ ފެކިން ފެސިލިޓީގެ އޮޕަރޭޝަންތައް ހިންގާނެ ގޮތްތައް ނިންމާނީ މިފްކޯއާ މަޝްވަރާކޮށްގެން ކަމަށެވެ.

"ވިސްނުން ހުރީ ހުޅުމާލޭގައި މިފްކޯއިން އެ ފެސިލިޓީ ތަރައްގީ ކުރިޔަސް، އެތަނުގެ އޮޕަރޭޝަންތައް ކުރިއަށް ގެންދަން މަދުން މަސް އެކްސްޕޯޓުކުރާ ފަރާތްތަކަށް ނޫނީ ޔޫނިއަންތަކަށް ދޭން." އޭނަ ވިދާޅުވި އެވެ.

ކ. ކަނޑުއޮތްގިރީގައި މިފްކޯ އިން ކުރިއަށް ގެންދާ ހުރިހާ މަސައްކަތްތަކެއް ހުޅުމާލެ އަށް ބަދަލުކުރުމުގެ މަސައްކަތްތަކެއް ވެސް މިހާރު ކުރިއަށްދާ ކަމަށް ވެސް ފިޝަރީޒް މިނިސްޓްރީން ކުރިން ބުނެފައިވެ އެވެ.