އިންވެސްޓަރުންނަށް ފަހި ފުރުސަތުތަކެއް ހޯދައިދީ، ލުއި ގޮތްތަކެއް ފޯރުކޮށްދިނުމަށް ސަރުކާރުން އަބަދުވެސް އިސްކަންދޭނެ ކަމަށް ޓޫރިޒަމް މިނިސްޓަރު އިބްރާހިމް ފައިސަލް މިއަދު ވިދާޅުވެއްޖެ އެވެ.

އޮސްޓްރޭލިއަން ހޮޓެލް އިންޑަސްޓްރީ ކޮންފަރެންސް އެންޑް އެގްޒިބިޝަން (އަހައިސް) އިން އިންތިޒާމްކޮށްގެން ބޭއްވި "އަހައިސް މޯލްޑިވްސް ހޮޓެލް އިންވެސްޓްމެންޓް ސަމިޓު" ގައި ވާހަކަ ދައްކަވަމުން ފައިސަލް ވިދާޅުވީ އިންވެސްޓަރުންނަށް ފަހި މާހައުލެއް ހޯދައިދޭން، ބޮޑެތި ލުއިތަކެއް އެބަހުރި ކަމަށާއި ސަރުކާރުން އަބަދުވެސް އެންމެ ބޮޑު އިސްކަމެއް ދެނީ އިންވެސްޓަރުންނަށް ފަހި ފުރުސަތުތަކެއް ހޯދައިދީ ލުއި ގޮތްތަކެއް ފޯރު ކޮށްދިނުމަށް ކަމަށެވެ.

"ޓޫރިޒަމް އިންޑަސްޓްރީގެ ކާމިޔާބީ ގުޅިފައި ވަނީ ކާމިޔާބު އިންވެސްޓްމެންޓްތަކާ. އާ ޓޫރިޒަމާ ބެހޭ ގާނޫނުން އިތުރު ފަސޭހަތަކެއް އިންވެސްޓަރުންނަށް ފުރުސަތުތައް ލިބޭނެ،" އޭނާ ވިދާޅުވި އެވެ.

Advertisement

ފައިސަލް ވިދާޅުވީ، ރާއްޖޭގައި އިންވެސްޓް ކުރުމުގެ އެންމެ ބޮޑު ފައިދާއަކީ، ރާއްޖެއަކީ މަޝްހޫރު ގައުމަކަށް ވުމާއިއެކު ޓޫރިސްޓުންގެ ޑިމާންޑް އޮންނަ ގައުމަކަށް ރާއްޖެވުމެވެ. މީގެއިތުރުން ރާއްޖެއަކީ މިސަރަހައްދުގެ އެންމެ ޓޮޕް މާކެޓު ކަމުން ރާއްޖެއަށް އިންވެސްޓް ކުރުމުން ފައިދާ ލިބުމުގައި ހޭދަކުރަން ޖެހޭ މުއްދަތު ކުރުވާނެ ކަމަށްވެސް ފައިސަލް ވިދާޅުވިއެވެ.

ހަމައެހެންމެ، ސަރުކާރުން ޓޫރިޒަމް ފުޅާކުރުމުގައި ދެމެހެއްޓެނިވި ގޮތްތަކެއް ހޯދުމަށް ވަރަށް ބޮޑު އިސްކަމެއް ދޭ ކަމަށް މިނިސްޓަރު ވިދާޅުވި އެވެ.

މިއަދު ބޭއްވި ކޮންފެރެންސްގައި ޓޫރިޒަމް ދާއިރާއިން ބައިވެރިވި 140 މީހުންނަށް ޓޫރިޒަމް ދާއިރާއިން ރާއްޖޭގައި ލިބެން ހުރި ފުރުސަތުތަކުގެ މައުލޫމާތު ވެސް ވަނީ ދީފައެވެ.