ކުރިއަށް އޮތް ހަތަރު އަހަރު ތެރޭގައި ހުޅުމާލޭގައި އިތުރު ހަތް ސްކޫލް އިމާރާތް ކުރަން ނިންމާފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ މިއަދު މާލެ ސިޓީ ކައުންސިލް އިދާރާއަށް ޒިޔާރަތް ކުރައްވާ މާލެ ސިޓީ ކައުންސިލް މެންބަރުންނާއި ވަހާކަފުޅު ދައްކަވަމުންނެވެ.

ރައީސް ވިދާޅުވީ ކޮންމެ ދުވަހަކު ވެސް ގިނަ ބަޔަކު މާލެ އާއި ހުޅުމާލެ އާއި ދެމެދު އެކި ހިދުމަތްތައް ހޯދުމުގެ ބޭނުމުގައި ދަތުރުކުރަންޖެހޭ ކަމާއި މިފަދައިން ދަތުރުކުރާ ދަރިވަރުންނަށް ދާއިމީ ހައްލެއް ހޯދައިދިނުމުގެ ބޭނުމުގައި ހުޅުމާލޭގައި ސްކޫލުތައް ގިނަ ކުރަން ޖެހޭ ކަމަށެވެ.

Advertisement

އެގޮތުން ސަރުކާރުން ހުޅުމާލޭގައި ހަތް ސްކޫލެއް އެޅުމަށް ނިންމާފައިވާ ކަމަށާއި ހުޅުމާލޭގެ ތިން ފިޔަވަހީގައި އާބާދުވާ މީހުންގެ އަދަދު ދެލައްކައަށް ވުރެ ގިނަ އިރު މިހާރު ހުރި ސްކޫލްތަކާ އެކު ޖުމްލަ 22 ސްކޫލު ބޭނުންވާކަމަށް ރައީސް ވިދާޅުވި އެވެ.

"މި އަހަރާ އެކީގައި ކުރިއަށް އޮތް ހަތަރު އަހަރު، އަޅުގަނޑުމެން ބަލާނަން ކިތައް ސްކޫލުތޯ ހެދެނީ. މަދުވެގެން ހަތް ސްކޫލު ނޫނީ 10 ވަރަކަށް ސްކޫލް، ކުރިއަށް އޮތް ހަތަރު އަހަރު ތެރޭ އަޅާނެ،" ރައީސް ވިދާޅުވި އެވެ.

ސިނަމާލޭގެ ބްރިޖުގެ ޓްރެފިކްގެ މައްޗަށް އަލިއަޅުވާލާ ރައީސް ވިދާޅުވީ އިތުރު 10 ސްކޫލު ހުޅުމާލޭގައި އެޅިއްޖެ ކަމުގައިވާ ނަމަ ސިނަމާލެ ބްރިޖުގެ ޓްރެފިކްއަށް ވަރަށް ބޮޑު ލުޔެއް ލިބޭނެ ކަމަށެވެ.

ރައީސް ވިދާޅުވީ ހުޅުމާލޭގައި އިތުރަށް 10 ސްކޫލު އެޅިއްޖެ ނަމަ ސިނަމާލެ ބްރިޖުގެ ޓްރެފިކަށް ވަރަށް ބޮޑު ލުޔެއް ލިބޭނެ އެވެ.

ހުޅުމާލޭގައި އިތުރު ސްކޫލުތައް އަޅަން ނިންމާފައިވާ ކަމަށް ރައީސް ވިދާޅުވެފައިވާއިރު، މިއަހަރުގެ ތެރޭގައި ހުޅުމާލޭގައި އިތުރު ތިން ސްކޫލު އިމާރާތް ކުރުމުގެ މަސައްކަތް ފަށާނެ ކަމަށް އެޑިއުކޭޝަން މިނިސްޓަރު ޑރ. އިސްމާއީލް ޝަފީއު މިދިޔަ ހަފުތާގައި ވަނީ ވިދާޅުވެފަ އެވެ. އެއީ ހުޅުމާލެ 1 ގައި ސްކޫލަކާއި ހުޅުމާލެ 2 ގައި ސްކޫލެއް ކަމަށާއި އެހެންނަމަވެސް ތިންވަނަ ސްކޫލު އަޅާނެތަނެއް އަދި ނުނިންމާކަމަށް މިނިސްޓަރު ވަނީ ވިދާޅުވެފައެވެ.