ޖޫން މަހާ އަޅާބަލާއިރު ޖުލައި މަހު ރާއްޖޭގައި ރޯގާގެ ގޮތުގައި ފެތުރެމުންދާ ބަލިތައް ރިޕޯޓު ކުރި އަދަދު ބޮޑުތަނުން ދަށްވެފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.

އެޗްޕީއޭއިން އާންމުކޮށްފައިވާ ތަފާސް ހިސާބުތަކުން ދައްކާގޮތުގައި އަރިދަފުސް ރޯގާޖެހިގެން ޖޫން މަހުގައި 32738 މައްސަލަ ރިޕޯޓްކޮށްފައިވާއިރު، ޖުލައި މަހު އެއަދަދު ވަނީ 30293 އަށް ދަށްވެފައެވެ.

ހުސްވި އަހަރުގެ ތަފާސްހިސާބުތަކަށް ބަލާލާއިރު، 2023 ވަނަ އަހަރުގެ ޖޫންމަހުގައި އަރިދަފުސް ރޯގާގެ 25749 މައްސަލަ ރިޕޯޓްކޮށްފައިވާއިރު ޖުލައި މަހު ރިޕޯޓްކޮށްފައިވަނީ 23206 މައްސަލައެވެ.

އެޗްޕީއޭއިން އާންމުކޮށްފައިވާ ތަފާސް ހިސާބުތަކުން ދައްކާ ގޮތުގައި ފާއިތުވި ތިން މަހާއި އަޅާކިޔާއިރު، ޑެންގީހުން ޖެހިގެން ރިޕޯޓްކޮށްފައިވާ މައްސަލަތައް ވަނީ 556، 623 އިން 556 ދަށް ވެފައެވެ.

ޖޫން މަހާއި އަޅާބަލާއިރު، ޖުލައި މަހުގައި އިންފުލެއެންޒާއަށް ޓެސްޓު ކުރެވުނު އަދަދު ވަނީ އިތުރުވެފައިވީ ނަމަވެސް ޕޮޒިޓިވްވި އަދަދު ވަނީ މަދުވެފައެވެ.

- 2024 ޖޫން މަހު ޓެސްޓް ކުރެވުނު އަދަދު - 395

- 2024 ޖޫން މަހު ޕޮސިޓިވްވި އަދަދު - 137

- 2024 ޖޫލައި މަހު ޓެސްޓް ކުރެވުނު އަދަދު - 439

- 2024 ޖުލައި މަހު ޕޮސިޓިވްވި އަދަދު - 100

މިއަހަރުގެ ތަފާސްހިސާބުތަކަށް ބަލާލާއިރު، މިހާތަނަށް ޓެސްޓްކުރެވުނު 1943 ސާމްޕަލްގެ ތެރެއިން 394 ސާމްޕަލް ވަނީ ޕޮޒިޓިވް ވެފައެވެ.