މޫސުން ގޯސްވުމުގެ ސަބަބުން މެދު ރާއްޖޭތެރޭގެ އަތޮޅުތަކަށް ހުދު ސަމާލު ނެރެފި އެވެ.

މޫސުމާއިބެހޭ ގައުމީ އިދާރާއިން ލަފާކޮށްފައިވާ ގޮތުގައި މެދުރާއްޖޭގެ އަތޮޅުތަކަށް ގަޑިއަކު 19 މޭލާއި 24 މޭލާ ދެމެދު ބާރު މިނުގައި ވައި ޖެހުން އެކަށީގެންވާތީވެ އަދި ގަޑިއަކު 45 މޭލަށް ވައި ގަދެވެ ކަނޑުތައް ގަދަވާނެ ކަމަށް ލަފާކުރެވޭ ކަމަށެވެ.

އެހެންކަމުން މިރޭގެ 1:00 އިން ފެށިގެން ހެނދުނު 7:00 ޖަހަންދެން އެއިދާރާއިން ވަނީ މެދުރާއްޖޭގެ އަތޮޅުތަކަށް ހުދު ސަމާލު ނެރެފައެވެ.

Advertisement

މޫސުމާއިބެހޭ ގައުމީ އިދާރާއިން ވަނީ މިހަފްތާގެ އާދިއްތަ ދުވަހުން ފެށިގެން ފަސްދުވަހު ރާއްޖެ ސަރަހައްދުގައި ހުޅަނގު މޫސުމުގެ ބާރު ގަދަވާނެ ކަމަށާއި ބޯކޮށް ވަރޭ ވެހި، ކަނޑުތައް ގަދަވާނެ ކަމަށް ލަފާކުރެވޭތީ ހުރިހާ ފަރާތްތަކުން މޫސުމަށް ސަމާލުވުމަށް އިލްތިމާސްކޮށްފައެވެ.

އަދި ޚާއްސަ ގޮތެއްގައި ކަނޑުދަތުރުކުރާ ފަރާތްތަކުން ދަތުރު ފެށުމުގެ ކުރިން އެންމެ ފަހުގެ މޫސުމީ މައުލޫމާތު ހޯދައިގެން ދަތުރު ކުރުމަށް ވެސް އެއިދާރާއިން ވަނީ އެދިފައެވެ.