ސަރުކާރު ކުންފުނިތަކުން ކޮރަޕްޝަންގެ ތުހުމަތުވާ މުވައްޒަފުން ވަކިކުރަން ސަރުކާރަށް ލަފާދޭން ނިންމައިފި އެވެ.

ރައްޔިތުންގެ މަޖިލީހުގެ މާލިއްޔަތު ކޮމިޓީގެ ހުރިހާ މެންބަރުންގެ އިއްތިފާގުން ނިންމާފައި ވަނީ ކޮރަޕްޝަންގެ ތުހުމަތުވާ މުވައްޒަފުން ވަކިކުރަން ސަރުކާރަށް ލަފާދޭންށެވެ.

ކޮރަޕްޝަންގެ ތުހުމަތުވާ މުވައްޒަފުން ވަގުތުން މަގާމުން ވަކިކުރެވޭ ގޮތަށް ހިއުމަން ރިސޯސަސް އޮނިގަނޑަށް ބަދަލު ގެންނަން ސަރުކާރަށް ލަފާދޭން މަޖިލީހުގެ ނައިބު ރައީސް އަހުމަދު ނާޒިމް މާލިއްޔަތު ކޮމިޓީގެ ބައްދަލުވުމުގައި ހުށަހަޅުއްވަމުން ވިދާޅުވީ ކޮރަޕްޝަނަށް ވާގިވެރިވާ އެހެން މުވައްޒަފުން ކުންފުނީގެ މަގާމުތަކުގައި ތިބުމަކީ ރަނގަޅު ގޮތެއް ނޫންކަމަށެވެ.

Advertisement

ނާޒިމް އިތުރަށް ވިދާޅުވީ ކޮރަޕްޝަންގެ މައްސަލަތައް ހުއްޓުވުމަށް ޓަކައި، އެންޓި ކޮރަޕްޝަން ކޮމިޝަނުން ސަރުކާރަށް ހުށަހަޅާފައިވާ ކަންތައްތައް އަމަލީ ގޮތުން ތަންފީޒު ކުރަން ޖެހޭ ކަމަށާއި ކޮރަޕްޝަން ހުއްޓުވޭނެ ހަމަ އެކަނި ގޮތަކީ ކުންފުނިތަކުގެ ހިއުމަން ރިސޯސަސް އޮނިގަނޑު ބަދަލުކޮށް، ކޮރަޕްޝަންގައި ޝާމިލުވާ އެންމެނަށް ފިޔަވަޅު އެޅޭނެ ގޮތެއް ހަމަޖެއްސުން ކަމަށެވެ.

ސަރުކާރު ބަދަލުވާއިރު ކޮރަޕްޝަންގެ އަމަލުތައް ހިންގި ކުންފުނިތަކުގެ އިސްވެރިން މަގާމުތަކުގައި ތިބި ކަމުގައިވީ ނަމަވެސް އެ ކޮރަޕްޝަނުގެ އަމަލު ހިނގުމުގައި ބައިވެރިވެފައިވާ އެހެން މުވައްޒަފުންނާއި މެދު ފިޔަވަޅު އަޅަން ސަރުކާރަށް ހުށަހެޅުމަށް ނާޒިމް ވަނީ ލަފާއަރުވާފަ އެވެ.