ބިންވެރިޔާ ސްކީމްގެ ދަށުން މާލެއިން ގޯތި ލިބުނު މީހުންގެ ތެރެއިން މީހަކު މަރުވުމުން، މަރުވި މީހާގެ ވާރިސުންނަށް އެބިން ލިބޭނެ ކަމަށް ހައުސިން މިނިސްޓްރީން މިއަދު ބުނެފިއެވެ.

ބިންވެރިޔާ ސްކީމްގެ ދަށުން ގޯތި ލިބުނު މީހުންނަށް ބިން ބިން ދޫކުރުމުގެ މަސައްކަތް ހައުސިން މިނިސްޓްރީން ކުރަމުން އަންނައިރު، ބައެއް ބިންތައް ހިއްކާ ނުނިމޭތީވެ ބިންވެރިޔާއަށް ބިން ހަވާލު ކުރެވޭ ގޮތް ވަނީ ނުވެފައެވެ.

އެހެންނަމަވެސް ހައުސިން މިނިސްޓްރީން މިއަދު އާންމުކުރި އިއުލާނެއްގައި ބުނެފައި ވަނީ ބިންވެރިޔާ ސްކީމްގެ ދަށުން ބިން ލިބިފައިވާ ފަރާތްތަކުގެ ތެރެއިން އެޕްލިކަންޓެއް ނުވަތަ އެޕްލިކަންޓް މަރުވެފައިވާ ފަރާތްތަކުން ޝަރުއީ ކޯޓުން ވާރިސުން ސާބިތުކުރަން ޖެހޭނެ ކަމަށާއި އެއަށް ފަހު ގަޒިއްޔާ ނިމުނު ގޮތުގެ ރިޕޯޓު މިނިސްޓްރީގެ ހިޔާވެހި ޕޯޓަލަށް ހުށަހަޅުމަށްފަހު އެޕޮއިންޓްމެންޓަކަށް އެދުމުން އެމިނިސްޓަރީން ސޮއިކުރުމުގެ އިންތިޒާމު ހަމަޖައްސައިދޭނެ ކަމަށެވެ.

Advertisement

ކުރީ ސަރުކާރުން ކުރިއަށްގެންދި ބިންވެރިޔާ ސްކީމްގެ ފުރަތަމަ ފިޔަވަހީގެ ދަށުން 18،955 މީހުން ގޯއްޗަށް ޝަރުތު ހަމަވާއިރު ސަރުކާރުން ވަނީ 9003 ގޯތި ދޫކުރުމަށް ނިންމާފައެވެ. އެގޮތުން މާލެ ސަރަހައްދުގައި ހިމެނޭ ގިރާވަރުފަޅާއި ގުޅިފަޅުގެ އިތުރުން ހުޅުމާލެ އިން ބިން ދޫކުރުމަށް ވަނީ ހަމަޖެހިފައެވެ.

ހައުސިން މިނިސްޓްރީން ހާމަކޮށްފައިވާ ގޮތުގައި މިހާތަނަށް ހުޅުމާލެއިން 624 ގޯތި ވަނީ ދޫކޮށްފައިވާ ކަމަށެވެ. މީގެ އިތުރުން އިއްޔެ ރައްޔިތުންގެ މަޖިލީހުގައި ވާހަކަ ދައްކަވަމުން ހައުސިން މިނިސްޓަރު ޑރ. އަލީ ހައިދަރު ވިދާޅުވީ މިއަހަރުގެ އޮކްޓޯބަރު މަހުގެ ނިޔަލަށް ހުޅުމާލެ ދެވަނަ ފިޔަވަހިން ދޭންޖެހޭ ހުރިހާ ގޯއްޗެއް ވެރިފަރާތާއި ހަވާލުކޮށް ނިންމާނޭ ކަމަށެވެ.

މިނިސްޓަރު ވިދާޅުވީ ހުޅުމާލޭ ދެވަނަ ފިޔަވަހިން ދޫކޮށްފައިވާ ބިންތައް ދޫކޮށްފައި ވަނީ މަގުތަކަށް އަރާ ގޮތަށާއި އެކި ކުންފުނިތަކުން ސާމާނުތައް ބަހައްޓާފައި ހުރި ސަރަޙައްދުތަކުން ކަމަށާއި ކަނޑުންނާއި ފަޅުންވެސް ބައެއް ގޯތިތައް ދޫކޮށްފައިވާ ކަމަށާއި އެއީ ގޯތީގެ ގޮތުގައި ނުބެލޭނެ ކަމަށެވެ.