ނޭޝަނަލް ޑިޒާސްޓަރ މެނޭޖްމެންޓް އޮތޯރިޓީ އިން ރާއްޖެއަށް ކުރަމުންދާ ވިއްސާރައިގެ ސަބަބުން ލިބުނު ގެއްލުމުގެ އެސެސްމެންޓެއް ހަދަން ފަށައިފިއެވެ.

ވިއްސާރައާއި ގުޅިގެން ހާލުގައި ޖެހުނު ފަރާތްތަކަށް ބޭނުންވާ އެހީތެރިކަން އެ އިދާރާއިން ފޯރުކޮށްދެމުން އަންނަ ކަމަށް ނޭޝަނަލް ޑިޒާސްޓަރ މެނޭޖްމެންޓް އޮތޯރިޓީ (އެންޑީއެމްއޭއިން) ވަނީ ބުނެފައެވެ. އަދި މީގެއިތުރުން، ވިއްސާރައިގެ ސަބަބުން ލިބުނު ގެއްލުންތަކުގެ އެސެސްމަންޓް ހެދުމުގެ މަސައްކަތް މާދަމާ ފެށުމަށް ތައްޔާރުވަމުން އަންނަ ކަމަށް ވެސް އެއިދާރާއިން ވަނީ ބުނެފަ އެވެ.

ރާއްޖެއަށް ކުރަމުން މިދާ ހުޅަނގު މޫސުމުގެ ގަދަ ވިއްސާރައިގެ ސަބަބުން އިއްޔެ ވެރިރަށް މާލެ ހިމެނޭހެން ގިނަ ރަށެއްގައި ފެން ބޮޑުވެފައިވާއިރު މާލެއިން އެކަނި ވެސް 208 ގޭބީސީއަކަށް އެހީތެރިކަން ފޯރުކޮށްދީފައިވާ ކަމަށް އެމްއެންޑީއެފް އިން ވަނީ ބުނެފަ އެވެ. އެމްއެންޑީއެފުން ހާމަކޮށްފައިވާ ގޮތުގައި މާލޭގެ މަގުތަކުން އިއްޔެ 3 މިލިއަން ލީޓަރަށް ވުރެ ގިނަ ފެން ވަނީ ޕަމްޕްކޮށްފައެވެ.

Advertisement

މި ވިއްސާރާގެ ސަބަބުން 20 އަށްވުރެ ގިނަ ރަށަކަށް ގެއްލުން ލިބިފައިވާ ކަމަށް އެންޑީއެމްއޭއިން ވަނީ ބުނެފައެވެ.