މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވުޒާރާގެ ސްޓޭޓު މިނިސްޓަރު، ޝަމްނާޒު އަލީ ސަލީމްގެ މައްޗަށް ދައުވާ ކުރެވޭ މިންވަރަށް ހެކި ލިބިފައި ނެތުމުން ދައުވާ ނުކުރުމަށް ޕްރޮސިކިއުޓާ ޖެނެރަލްގެ އޮފީހުން ނިންމަވައިފިއެވެ.

މިމައްސަލައިގައި ދައުވާ ނުކުރުމަށް ނިންމާފައި ވަނީ އެކަށީގެންވާ މިންވަރަށް ހެކި ލިބިފައި ނުވާތީ ކަމަށް ޕީޖީ އިން ވަނީ ބުނެފައެވެ.

ޝަމްނާޒްގެ އިތުރުން އޭނާގެ ކޮއްކޮ މިމައްސަލާގައި ހައްޔަރުކޮށްފައި ވަނީ ރައީސް ޑރ. މުޢިއްޒު އަދި އެމަނިކުފާނުގެ ޢާއިލާއަށް ސިހުރު ހެދުމުގެ ތުހުމަތުގައި ޖޫން މަހުގެ 23 ވަނަ ދުވަހު އެވެ. އެހެންނަމަވެސް ޖުލައި މަހުގެ 13 ވަނަ ދުވަހު ބަންދުގައި އިތުރަށް ބަހައްޓަން ޖެހޭ ސަބަބެއް ނުފެންނަ ކަމަށް ބަޔާންކޮށް ޝަމްނާޒް އާއި އޭނާގެ ކޮއްކޮ ވަނީ ބަންދުން ދޫކޮށްލާފަ އެވެ.

Advertisement

މީގެއިތުރުން މިމައްސަލަ އާއި ގުޅިގެން ހައްޔަރު ކޮށްފައިވާ ތިންވަނަ ފަރާތް ވެސް ވަނީ ޖުލައި މަހު 1 ވަނަ ދުވަހު ދޫކޮށްލާފަ އެވެ.

މިމައްސަލަ އާއި ގުޅިގެން ޝަމްނާޒް ސްޓޭޓް މިނިސްޓަރުގެ މަގާމުން ވަކިކޮށްފައިވާއިރު، އޭނާގެ ކުރީގެ ފިރިމީހާ ވެސް ވަނީ ރައީސް އޮފީހުގެ މިނިސްޓަރުގެ މަގާމުން ވަކިކޮށްފަ އެވެ.