މަސްތުވާތަކެތި އެތެރެ ކުރާ މީހުންގެ މައްޗަށް މަރުގެ އަދަބު ކަނޑައެޅޭ ގޮތަށް މަސްތުވާތަކެތީގެ ޤާނޫނަށް އިސްލާހު ކުރުމަށް ހޯމް މިނިސްޓްރީން ބިލެއް ހުށަހަޅައިފި އެވެ.

ހޯމް މިނިސްޓްރީން ޑްރާފްޓް ކުރުމަށްފަހު ހުށަހަޅާފައިވާ ބިލްގައި ބަޔާންކޮށްފައިވާ ގޮތުގައި އެބިލްގެ ޖަދުވަލު 1 ގައިވާ މަސްތުވާތަކެތި، 500 ގްރާމްއަށް ވުރެ ގިނައިން އެތެރެކޮށްފިނަމަ އެމީހެއްގެ މައްޗަށް މަރުގެ އަދަބު ކަނޑައެޅޭނެ އެވެ. މީގެ ކުރިން މިމާއްދާގައި ކަނޑައަޅާފައި ވަނީ އެފަދަ މީހުން އުމުރަށް ޖަލަށް ލުމަށެވެ.

މަރުގެ އަދަބު ކަނޑައެޅޭނީ ޖަދުވަލު 1 ގައި ބަޔާންކޮށްފައިވާ މަސްތުވާތަކެތީގެ ތެރެއިން ބާވަތެއް 500 ގްރާމަށް ވުރެއް ގިނައިން އެތެރެ ކުރުން ކަމަށް ބަޔާންކޮށްފައިވާއިރު، ޖަދުވަލު 1 ގައި މަސްތުވާތަކެތީގެ 139 ބާވަތެއް ހިމެނެއެވެ.

Advertisement

މީގެއިތުރުން، 500 ގްރާމްއަށް ވުރެ ގިނަ އަދަދެއްގެ މަސްތުވާތަކެތި ރާއްޖެއަށް އެތެރެކުރުމުން އެމީހެއްގެ މައްޗަށް މަރުގެ އަދަބު ކަނޑައެޅޭނެ ކަމަށާއި، އަދަބު ތަންފީޒު ކުރުމުގެ ކުރިން ޝަރުއީ ހުރިހާ މަރުހަލާތަކެއް ފުރިހަމަ ކުރަން ވާނެ ކަމަށް އެބިލުގައި ބަޔާންކޮށްފައިވެ އެވެ.