ޕާކިސްތާނުގެ ދެކުނުގައި ރޭލެއް ރޭލު ދަގަނޑުން ކަހާލާ 30 މީހުން މަރުވެ 100 މީހުން ޒަޚަމްވެފައިވާ ކަމަށް ފުލުހުންގެ ތަރުޖަމާނަކު ކަށަވަރުކޮށްދީފި އެވެ.

ޒަޚަމްވި ފަސިންޖަރުން ވަނީ ކައިރީގައި ހުރި ހޮސްޕިޓަލްތަކަށް ބަދަލުކޮށްފައެވެ. ރެސްކިއު ޓީމުތަކުން ދަނީ ބުރިވެފައިވާ ރޭލުގެ ބައިތަކުގެ ތެރެއިން މީހުން ސަލާމަތް ކުރުމުގެ މަސައްކަތް ކުރަމުންނެވެ.

ރޭލްވޭ މިނިސްޓަރު ސާދު ރަފީގު ވިދާޅުވީ ފުރަތަމަ ތަހުގީގުތަކުން ދައްކާ ގޮތުގައި ރޭލު ދަތުރުކުރަމުން ދިޔައީ އާދައިގެ ސްޕީޑެއްގައި ކަމަށާއި ރޭލު ރޭލު ދަގަނޑުން ކަހާލީ ކޮން ސަބަބަކާ ހުރެ ކަމެއް ކަށަވަރު ކުރަން މަސައްކަތް ކުރަމުން ކަމަށެވެ.

Advertisement

ސޯޝަލް މީޑިއާގައި އާންމުކޮށްފައިވާ ވީޑިއޯތަކުން ފެންނަ ގޮތުގައި އެކްސިޑެންޓް ހިނގި ތަނުގައި ދިހަވަރަކަށް މީހުން ތިބިއިރު، ފުނޑުފުނޑުވެފައިވާ ރޭލުގެ ބައިތަކުން ބައެއް ފަސިންޖަރުން ފައިބައިގެން ދާ މަންޒަރު ފެނެއެވެ.

2021 ވަނަ އަހަރު ސިންދު ޕްރޮވިންސްގައި ދަތުރުކުރަމުން ދިޔަ ދެ ރޭލެއް ޖެހި، 40 މީހުން މަރުވެ، ދިހަވަރަކަށް މީހުން ޒަޚަމްވެފައިވެއެވެ.

2013 އާއި 2019 އާ ދެމެދު މިފަދަ ހާދިސާތަކުގައި 150 މީހުން މަރުވެފައިވާ ކަމަށް ލޯކަލް މީޑިއާ ރިޕޯޓްތައް ބުނެއެވެ.