ބާސެލޯނާގެ ފުރަތަމަ މެޗުގައި ރޭ ރަށުން ބޭރުގައި ރޮބަޓް ލެވަންޑޯސްކީ ކާމިޔާބުކުރި ލަނޑުތަކުން ބާސެލޯނާ އިން ފަހަތުންއަރައި 2-1 އިން ވެލެންސިއާ އަތުން މޮޅުވެއްޖެއެވެ.

މިމެޗަށް ނިކުތްއިރު އަނިޔާގެ ސަބަބުން ބާސެލޯނާގެ މުހިއްމު ބައެއް ކުޅުންތެރިން ކަމަށްވާ، އިލްކާއި ގުންޑޮއާން، ޕެޑްރީ، ގާވީ، ރޮނާލްޑް އަރައޫހޯ، ފްރެންކީ ޑި ޔޯން އަދި އަންސޫ ފާޓީ ނުކުޅެވުނެވެ. މީގެއިތުރުން، އައު ސީޒަނަށް އެ ޓީމުން ގެނައި ސްޕެއިނުގެ މިޑްފީލްޑަރު، ޑަނީ އޯލްމޯ ވެސް ލީގުގައި އެ ޓީމުގެ ކުޅުންތެރިއެއްގެ ގޮތުގައި ރަޖިސްޓްރީކުރެވޭ ގޮތްނުވުމުން ސްކޮޑަށް ނުނެގުނެވެ.

ފުރަތަމަ ހާފު ނިމެން މިނެޓަކަށްވެފައިވަނިކޮށް ވެލެންސިއާ އިން ލީޑްނެގީ ހޫގޯ ޑޫރޯ ކާމިޔާބުކުރި ގޯލުންނެވެ.

Advertisement

ބާސެލޯނާ އިން އެއްވަރުކުރި ލަނޑު، ފުރަތަމަ ހާފުގެ އިތުރުވަގުތުގެ ފަސްވަނަ މިނެޓުގައި ކާމިޔާބުކޮށްދިނީ ލެވަންޑޯސްކީ އެވެ. ލެވަންޑޯސްކީ މި ލަނޑުޖެހީ އެންމެ ފަހުގެ ޔޫރޯ ފުޓްބޯޅަ މުބާރާތުގައި މޮޅު ކުޅުމެއްދެއްކި ސްޕެއިނުގެ ޒުވާން ވިންގް، ލަމީން ޔަމާލް ނަގައިދިން ހުރަހަކުންނެވެ. މިއާއެކު، ފުރަތަމަ ހާފު ނިމުނީ 1-1 އިން އެއްވަރުވެގެންނެވެ.

ދެވަނަ ހާފު ފެށިގެން ހަތަރުވަނަ މިނެޓުގައި ބާސެލޯނާ އިން މި މެޗުގައި ފުރަތަމަ ފަހަރަށް ލީޑްނެގި ލަނޑުޖަހައިދިނީ ވެސް ލެވަންޑޯސްކީ އެވެ. މިއީ ޕެނަލްޓީއޭރިޔާ ތެރެއިން ބާސެލޯނާގެ ބްރެޒިލް ވިންގް، ރަފީނިއާ އަށް ވެލެންސިއާގެ ޑިފެންޑަރު، ކްރިސްތިއަން މޮސްކޭރާ ކުރި ފައުލަކަށް ރެފްރީ ދިން ޕެނަލްޓީއަކުން ލެވަންޑޯސްކީ ކާމިޔާބުކުރި ގޯލެކެވެ.

މި މުބާރާތުގައި ރޭ ކުޅުނު އަނެއް މެޗުގައި އޮސަސޫނާއާ ލެގަނޭސް ވަނީ 1-1 އިން އެއްވަރުވެފައެވެ. އައު ސީޒަނުގެ ލީގުގައި އެންމެ ފަހުގެ ޗެމްޕިއަން، ރެއާލް މެޑްރިޑުން ކުޅޭ ފުރަތަމަ މެޗުގައި ނިކުންނާނީ ރަށުން ބޭރުގައި ރެއާލް މަޔޯކާއާ ދެކޮޅަށެވެ. މި މެޗު ފަށާނީ ރާއްޖޭގަޑިން މިރޭ 12:30 ގައެވެ.