މޫސުން ގޯސްވުމުގެ ސަބަބުން ރާއްޖެއަށް ކުރި ވިއްސާރާއިގައި މާލޭގެ 41 ގެއަކަށް ގެއްލުން ލިބިފައިވާ ކަމަށާއި އޭގެ ތެރެއިން 37 ގެއެއްގެ އެސެސްމަންޓު ހަދާފައިވާ ކަމަށް ނޭޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ) ވިދާޅުވެއްޖެއެވެ.

އެންޑީއެމްއޭއިން އެކްސްގައި ކުރެއްވި ޕޯސްޓެއްގައި ބުނެފައިވާ ގޮތުގައި ވިއްސާރައިގައި މާލޭގައި ގެއްލުން ލިބުނު ގެތަކުގެ ތެރެއިން 37 ގެއަކަށް ލިބުނު ގެއްލުމުގެ އެސެސްމަންޓު ހަދާފައިވާ ކަމަށާއި ލިބުނު ގެއްލުން 819،549 ރުފިޔާއަށް އަރާ ކަމަށެވެ.

"މި ވިއްސާރާގައި މާލޭގައި ފެންބޮޑުވުމުގެ ސަބަބުން އެސެސްމަންޓް ހަދަންޖެހޭކަމަށް ފާހަގަކުރެވުނު 41 ގެއެއްގެ ތެރެއިން 37 ގެއެއްގެ އެސެސްމަންޓް ވަނީ ހަދާނިމިފަ. 4 ގެއަކުން އެސެސްމަންޓް ހަދަން ބޭނުން ނުވާކަމަށް އެންގި. އިމާރާތަށާއި ހިފާ ގެންގުޅޭ ތަކެއްޗަށް -/819،549ރ ގެ ގެއްލުން ލިބުނު." އެންޑީއެމްއޭ އިން ވިދާޅުވެއްޖެއެވެ.

Advertisement

މީގެއިތުރުން، މިއަދުގެ 14:00 އާއި ހަމައަށް 13 ރަށެއްގެ 77 ގެއަކަށް ގެއްލުން ލިބި އެސެސްމަންޓް ފޯމު ހުށަހަޅާފައިވާ ކަމަށާއި 3 ރަށެއްގެ ދަނޑުބިންތަކަށް ވެސް ބޮޑެތި ގެއްލުންތަކެއް ލިބިފައިވާ ކަމަށް އެއޮތޯރިޓީން ވަނީ ބުނެފައެވެ. އަދި އެ މައްސަލަތައް ބަލައި އެސެސްމަންޓު ހަދަމުންދާ ކަމަށް އެއޮތޯރިޓީން ވަނީ ބުނެފަ އެވެ.