ރާއްޖޭގައި ބޭނުން ކުރެވޭ ޑޮލަރު ރިޒާވު ހުސްވެއްޖެ ކަމަށް އަދަދު ނޫހުން ރިޕޯޓް ކޮށްފައިވާ ޚަބަރަކީ ދޮގު ޚަބަރެއް ކަމަށް މޯލްޑިވްސް މަނިޓަރީ އޮތޯރިޓީ އިން ބުނެފި އެވެ.

އެމްއެމްއޭ އިން ނެރެފައިވާ ނޫސް ބަޔާނެއްގައި ބުނެފައިވާ ގޮތުގައި، ރާއްޖޭގެ ރިޒާވްއާ ބެހޭ ގޮތުން 'އަދަދު' ނޫހުގައި "ބޭނުން ކުރެވޭ ޑޮލަރު ރިޒާވު ތާރީހުގައި ވެސް ފުރަތަމަ ފަހަރަށް އެއްކޮށް ހުސްވެއްޖެ!" މި ސުރުޚީގެ ދަށުން ލިޔެފައިވާ ޚަބަރަކީ ހަގީގަތާ ޚިލާފު ދޮގު މައުލޫމާތު ހިމެނޭ ޚަބަރެއް ކަމަށެވެ.

އެމްއެމްއޭ އިން ބުނެފައިވާ ގޮތުގައި އެއޮތޯރިޓީން ރިޒާވްގެ މައުލޫމާތު މިހާރެކޭ އެއްގޮތަށް މަހުން މަހަށް ޝާއިއުކުރަމުންދާ ކަމަށެވެ.

Advertisement

މީގެއިތުރުން ރާއްޖޭގެ ބޭނުންކުރެވޭ ރިޒާވް ޖުލައި ނިމުނުއިރު ހުރި މިންވަރަށްވުރެ އޮގަސްޓް މަހުގެ ނިޔަލަށް އިތުރުވެގެންދާނެ ކަމަށް ލަފާކުރެވޭ ކަމަށް ވެސް އެއޮތޯރިޓީން ބުނެފައިވެ އެވެ.

އެމްއެމްއޭ އިން ވަނީ މިފަދަ ކަންތައްތަކާއި ގުޅޭ ޚަބަރުތައް ހަގީގަތާއި ޚިލާފަށް ރިޕޯޓް ކުރުމާއި މެދު ކަންބޮޑުވުން ފާޅުކޮށްފައެވެ.

"އެހެންކަމުން މިފަދަ ކަންތައްތަކާއި ގުޅޭ ޚަބަރުތައް ހަގީގަތާއި ޚިލާފަށް ގެނެސްދިނުމަކީ މިއޮތޯރިޓީން ނުހަނު ކަންބޮޑުވާކަމެއް ކަމަށް ދަންނަވަމެވެ،". އެމްއެމްއޭ އިން ބުނެފައިވެއެވެ.