މައްސަލަ ބޮޑު ދެކުނު ޗައިނާ ކަނޑުގައި ފިލިޕީންސްގެ އުޅަނދުތަކަށް ޗައިނާގެ ކޯސްޓްގާޑުން ފެން ބޮން ބޭނުން ކުރުމުން ފިލިޕީންސް ސަރުކާރުން ޗައިނާގެ ސަފީރަށް ހާޒިރުކޮށްފި އެވެ.

ފިލިޕީންސްގެ އަސްކަރިއްޔާއިން ހޮނިހިރު ދުވަހު އިއުލާން ކުރި ގޮތުގައި ސްޕްރަޓްލީ އައިލެންޑްސް ކައިރީގައި އޮންނަ ކަނޑުގެ ސަރަހައްދުގައި ޗައިނާގެ އުޅަނދަކުން ފެން ބޮމުގެ ހަމަލާތަކެއް ކުރިކަމަށް ށެވެ.

ހޯމަ ދުވަހު ފިލިޕީންސްގެ ގައުމީ ސަލާމަތާ ބެހޭ މަޖިލީހުން މެނިލާގައި ބޭއްވި ނޫސްވެރިންގެ ބައްދަލުވުމެއްގައި ބުނެފައި ވަނީ އެގައުމުގެ އެކްސްކްލޫސިވް އިގްތިސާދީ ސަރަހައްދުގެ ތެރޭގައި މި ހާދިސާ ހިނގާފައިވާ ކަމަށެވެ.

Advertisement

އެ ކުންފުނިން ބުނެފައި ވަނީ ދެ ސަޕްލައި ދޯނި އެސްކޯޓް ކުރަމުން ދިޔަ ފިލިޕީންސްގެ ދެ ކޯސްޓްގާޑް އުޅަނދަށް ވެސް ފެން ބޮން ސްޕްރޭކޮށް އެ ހާދިސާގެ ފޫޓޭޖް އާންމުކޮށްފައިވާ ކަމަށެވެ.

އެ ކައުންސިލުން ވަނީ ޗައިނާ ސަރުކާރުން "ހުޅަނގު ފިލިޕީންސް ކަނޑުގައި ކުރާ ގާނޫނާ ހިލާފު އަދި ބަލައިނުގަނެވޭ ހަރަކާތްތައް ވަގުތުން ހުއްޓާލުމަށް" ޑިމާންޑްކޮށްފަ އެވެ.

ޗައިނާގެ ކޯސްޓްގާޑުން ވަނީ ފިލިޕީންސްގެ ވާހަކަތަކާ ދެކޮޅު ބަޔާނެއް ނެރެފަ އެވެ. އެގޮތުން ފެން ބޮންތައް ޖަހާފައިވަނީ ޗައިނާގެ ސަރަހައްދީ ކަނޑުގެ ތެރޭގައި ކަމަށާއި ތަކުރާރުކޮށް އިންޒާރު ދިން ނަމަވެސް ފިލިޕީންސްގެ އުޅަނދުތައް އެގައުމުގެ ކަނޑުގެ ތެރެއަށް ވަދެފައިވާ ކަމަށް ބުނެފައިވެ އެވެ.

އިތުރަށް ބުނެފައިވަނީ ޗައިނާއިން އަޅަންޖެހޭ ފިޔަވަޅުތައް ތަންފީޒުކޮށްގެން އެގައުމުގެ ސަރަހައްދީ އިސްތިގުލާލު ހިމާޔަތް ކުރަމުން ގެންދާނެ ކަމަށެވެ.