ގޮތް ހުސްވެގެން މައިދާން ދޫކޮށްލާ މީހަކަށްވުމުގެ ބަދަލުގައި ގޮންޖެހުންތަކާ ކުރިމަތިލާން ޖެހޭ ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެއެވެ.

މަޖީދިއްޔާ ސްކޫލްގެ އަހަރީ ދުވަހާއި ގުޅިގެން ތައްޔާރު ކުރި މޮނިއުމަންޓް އިފްތިތާހު ކުރަން ބޭއްވި ޖަލްސާގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ ވަރުގަދަ އަޒުމެއްގައި ނުކުމެ މަސައްކަތްކޮށްފި ނަމަ، އެކަމެއް ކާމިޔާބުވާނެ ކަމަށާއި ކޮންމެ ދަރިވަރަކު ވެސް ކިޔަވަމުން ދާން ވާނީ ވަރުގަދަ އަޒުމެއްގައި ކަމަށެވެ.

މަޖީދިއްޔާ ސްކޫލްގެ މޮޓޯގައިވާ ވަރުގަދަ މެސެޖު ފާހަގަކުރައްވާ ރައީސް ވިދާޅުވީ އަޒުމުގައި މަސައްކަތްކޮށްފި ނަމަ، ކާމިޔާބީއަކީ ޔަގީންކަމާއެކު ލިބޭނެ އެއްޗެއް ކަމަށާއި މަސައްކަތްކޮށްފި ނަމަ، ކިޔެވުމާއި ގައުމު ބިނާ ކުރުމާއި ވަޒީފާގެ ކުރިއެރުން ހޯދުން ފަދަ ހަޔާތުގެ ކޮންމެ ކަމެއްގައި ވެސް ކާމިޔާބު ލިބޭނެ ކަމަށެވެ.

"ތިމާގެ ހަޔާތުގައި ކުރާ ކޮންމެ ކަމެއްގައި ހިންމަތާއި ވަރުގަދަ އަޒުމެއްގައި މަސައްކަތްކޮށްފިއްޔާ ﷲ ގެ އިރާދަފުޅާއި މިންވަރުފުޅާ އެކީގައި ކާމިޔާބު ނުވާނެ ކަމެއް ނޯންނާނެ. ދަތި، އުނދަގޫ އެއްވެސް ކަމެއް ނޯންނާނެ. ﷲ އަންގަވާފައި ވަނީ އަޅުންނަށް ހިންމަތާ އެކީގައި މަސައްކަތް ކުރާށޭ. އަޅުންނަށް އޮތީ މަސައްކަތް ކުރުން. އެމީހެއްގެ ކެރި ކުޅަދާނަ ކަން ހުރި އެންމެ މަތީ މިންވަރަކަށް މަސައްކަތް ކުރަން، މަސައްކަތް ކުރުމަށް ފަހު ﷲ ގެ ހަޟްރަތުގައި ވަކީލް ކުރޭ،" ރައީސް ވިދާޅުވިއެވެ.

"ވަރުގަދަ އަޒުމެއްގައި، ބުރަ މަސައްކަތްކޮށްފިއްޔާ ކާމިޔާބު ހާސިލް ނުވާނެ ދަތި އުނދަގޫ ކަމެއް ނުވާނެ. އެއީ އެ މޮޓޯގެ މާނައަކީ،" ރައީސް ވިދާޅުވިއެވެ.

ރައީސް ވިދާޅުވީ ދިވެހި ކޮންމެ މީހެއްގެ އަޒުމަކަށް ވާންވީ އެމީހެއްގެ ހަޔާތުގައި ނޫނީ އެމީހެއްގެ ފަރާތުން އަނެކުންނަށް ކަމެއް ކޮށްދިނުމުގައި އަދި އެމީހެއްގެ ފަރާތުން މުޖުތަމައުއަށާއި ގައުމަށް ކަމެއް ކޮށްދިނުމުގައި މި އަޒުމުގައި މަސައްކަތް ކުރުން ކަމަށެވެ.އަދި އޭރުން ﷲ ގެ ކާމިޔާބީ އޮންނާނީ ދާދި ކައިރީގައި ކަމަށް ރައީސް ވަނީ ވިދާޅުވެފަ އެވެ.

މީގެއިތުރުން މިފަދައިން މަސައްކަތް ކުރުމުން ގައުމުގައި ހުރި ބޮޑެތި މައްސަލަތައް ވެސް ހައްލު ކުރެވޭނެ ކަމަށް ވެސް ރައީސް ވިދާޅުވި އެވެ.

"ތިމަންނަ ނުވާނަމޭ ގޮތް ހުސްވެގެން މައިދާން ދޫކޮށްލާފައި ދާ މީހަކަށް. އެއާ ހިލާފަށް ކުރިމަތިވާ ހުރިހާ ޗެލެންޖްތަކަށް ކުރިމަތިލައިގެން ހުރިހާ ހުރަސްތަކެއް ގިރާކުރުމުގެ އަޒުމުގައި ކުރިއަށްދާށޭ ތިމަންނަ މި ހުރީ،" ރައީސް ވިދާޅުވިއެވެ.