ޑޮލަރުން އާމްދަނީ ލިބޭ ކުންފުނިތަކުން އިންކަމް ޓެކްސް އާއި ޕެންޝަން ފައިސާ އާއި ކަސްޓަމްސް ޑިއުޓީ ޑޮލަރުން ދޭގޮތަށް ގާނޫނަށް އިސްލާހު ގެނައުމަށް ކެބިނެޓުން ނިންމައިފި އެވެ.

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން އެޓާނީ ޖެނެރަލް އަހުމަދު އުޝާމް ވިދާޅުވީ، ޑޮލަރުގެ ތާށިކަމަށް ލުޔެއް ހޯދުމަށް ޕެންޝަން ގާނޫނާއި އިންކަމް ޓެކްސް ގާނޫނު އަދި މީރާގެ ގާނޫނަށް އިސްލާހު ގެންނާނެ ކަމަށެވެ.

އުޝާމް ވިދާޅުވީ އިއްޔެގެ ކެބިނެޓް ބައްދަލުވުމުގައި އެކަމާއި ގުޅޭ ގޮތުން މުހިންމު ނިންމުންތަކެއް ނިންމާފައިވާ ކަމަށާއި ޑޮލަރުން އާމްދަނީ ލިބޭ ކުންފުނިތަކުން ދައުލަތަށް ބައެއް ހާލަތުތަކުގައި ރުފިޔާ އިން ފައިސާ ދައްކާ ކަމަށާއި އިންކަމް ޓެކްސް ވެސް ރުފިޔާ އިން ދައްކާ ކަމަށެވެ.

Advertisement

"ސަރުކާރުން ގާނޫނުތަކާއި ގަވައިދުތަކަށް އިސްލާހު ގެނެސްގެން އަޅުގަނޑުމެން މިކަން އިސްލާހު ކުރާނަން. އެކަން ބަދަލު ކުރަން ކެބިނެޓުން ވަނީ ނިންމާފައި. އެއީ ޑޮލަރުން އިންކަމް ލިބޭ ކުންފުނިތަކުން ދައުލަތަށް ދައްކަން ޖެހޭ ފައިސާ މީގެ ފަހުން ދައްކަން ޖެހޭނީ ޑޮލަރުން ކަމަށް ކަނޑައަޅާނަން،" އުޝާމް ވިދާޅުވި އެވެ.

މީގެއިތުރުން، ޑޮލަރުން އާމްދަނީ ލިބޭ ކުންފުނިތަކުގެ މުވައްޒަފުންނަށް ޑޮލަރުން މުސާރަ ދެމުން ގެންދާއިރު، ޕެންޝަނަށް ފައިސާ ދައްކަނީ ދިވެހި ފައިސާއިންނެވެ. އެހެންކަމުން ކެބިނެޓުން ވަނީ އެކަން ބަދަލުކުރުމަށް ނިންމާފައިވާ ކަމަށާއި ޑޮލަރުން އާމްދަނީ ލިބޭ ކުންފުނިތަކުން އިންކަމް ޓެކްސް އާއި ޕެންޝަނާއި އަދި ކަސްޓަމްސް ޑިއުޓީ ވެސް ޑޮލަރުން ދައްކަން ޖެހޭ ގޮތަށް ގާނޫނަށް އިސްލާހު ގެންނާނެ ކަމަށް އުޝާމް ވިދާޅުވި އެވެ.  

"ޑޮލަރުން މުސާރަ ދޭ ކަމަށް ވަނީ ނަމަ ޕެންޝަން ފައިސާ ވެސް ދައްކަން ޖެހޭނީ ޑޮލަރުން ކަމަށް އަޅުގަނޑުމެން ކަނޑައަޅާނަން. އެކަން ކުރުމަށްޓަކައި އެމްއެމްއޭ އާއި މީރާއާ މަޝްވަރާކޮށް، ގާނޫނުތަކަށް ގެންނަން ޖެހޭ އިސްލާހުތައް ވަރަށް އަވަސް މުސްތަގްބަލެއްގައި ގެންނާނަން،" އުޝާމް ވިދާޅުވި އެވެ.

އުޝާމް ވިދާޅުވީ ޑޮލަރު މިފައިސާ ދައްކާގޮތަށް އިސްލާހު ގެންނަން ޖެހުނީ ސަރުކާރަށް ދައްކަން ޖެހޭ ފައިސާ ދެއްކުމަށްޓަކައި ކަޅު ބާޒާރަށް ޑޮލަރު ވިއްކައިގެން ފައިސާ ހޯދާ ކަމުގެ ޝަކުވާ ލިބެމުންދާތީވެ އެވެ.

އެހެންކަމުން މިއިސްލާހުތައް ގެނައުމަށްޓަކައި ކުރިއަށް އޮތް ދެހަފްތާގެ ތެރޭގައި އެކަމުގެ އަމަލީ މަސައްކަތް ނިންމާ ރައްޔިތުންގެ މަޖިލީހަށް ހުށަހަޅާނެ ކަމަށް ވެސް އުޝާމް ވިދާޅުވި އެވެ.