ފެނަކަ ކޯޕަރޭޝަންގެ ޑެޕިއުޓީ މެނޭޖިން ޑިރެކްޓަރުގެ މަގާމަށް ރައްޔިތުންގެ މަޖިލީހުގެ ކުރީގެ ހެންވޭރު ދެކުނު ދާއިރާގެ މެންބަރު މުހައްމަދު އަބްދުލް ކަރީމް (ރުކުމާ) އައްޔަން ކުރައްވައިފި އެވެ.

ފެނަކައިން ވަނީ އެ ކުންފުނީގެ ޑެޕިއުޓީ މެނޭޖިން ޑިރެކްޓަރުގެ މަގާމަށް ރުކުމާ އައްޔަންކޮށްފައިވާކަން އިއުލާންކޮށް މަރުހަބާ ކިޔައިފައެވެ.

ފެނަކައިން އާއްމު ކުރި އިއުލާންގައި ބުނެފައި ވަނީ ފެނަކަ އިން ކުރާ މަސައްކަތުގައި ރުކުމާގެ ލީޑަޝިޕާއި ތަޖުރިބާ މުހިންމު ވާނެ ކަމަށެވެ.

Advertisement

ރުކުމާ އެ މަގާމަށް އައްޔަން ކުރެއްވުމުގެ ކުރިން އޭނާ ހުންނެވީ ވޭސްޓް މެނޭޖުމަންޓް ކޯޕަރޭޝަން (ވެމްކޯ)ގެ ޑެޕިއުޓީ މެނޭޖިން ޑިރެކްޓަރުގެ މަގާމުގަ އެވެ. މިމަގާމަށް އޭނާ އައްޔަންކުރެއްވީ ރައީސް ޑރ. މުހައްމަދު މުއިއްޒު ވެރިކަމަށް ވަޑައިގެންނެވި ފަހުންނެވެ.

ރުކުމާ ފެނަކަގެ ޑީއެމްޑީގެ މަގާމަށް އައްޔަން ކުރެއްވުމުގެ ކުރިން އެމަގާމުގައި ހުންނެވީ އިބްރާހިމް ނާއިފް އެވެ. އޭނާ އެމަގާމުން ވަކިކުރުމަށްފަހު ފެނަކައިން ވަނީ ނާއިފްގެ ހިދުމަތްތަކަށް ޝުކުރު ދަންނަވާފަ އެވެ.