ބޭންކް އޮފް މޯލްޑިވްސް އިން އިއްޔެ ނިންމި ނިންމުމާއި ގުޅިގެން ހިންގަން އުޅުނީ ބަޣާވާތެއްކަމަށާއި ނުފޫޒު ނުފޯރުވާ މައްސަލަ ބަލާނެކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ރޭ ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ރައީސް ވުދާޅުވީ ގާނޫނު އަސާސީގައި އޮތް ގޮތަށް އެ މައްސަލަ ބަލައި އެކަމާއި ގުޅިގެން އަޅަންޖެހޭ ފިޔަވަޅުތައް އަޅާނެ ކަމަށެވެ.

އެމަނިކުފާނު ވިދާޅުވީ ބޭންކުން ނިންމި ނިންމުން އިއުލާން ކުރަން އުޅޭކަން އެމަނިކުފާނަށް އެނގިވަޑައިގެން ހިސާބުން ވަރަށް ގިނަ މަސައްކަތް ކުރެއްވި ކަމަށާއި، އެހެންނަމަވެސް، އެ މަނިކުފާނުގެ އަޑު ނާހައި އެނިންމުން ނެރުނީ ކަމަށެވެ.

ރައީސް އިތުރަށް ވިދާޅުވީ އެމަސައްކަތަކީ އެމްޑީޕީއިން ވަރަށް ދުރާލާ ރާވައިގެން ކޮށްފައިވާ މަސައްކަތެއް ކަމަށާއި، އެގޮތުން ކައިރި ބައެއް ގައުމުތަކުގައި ރައްޔިތުން މަގުމައްޗަށް ނުކުތުމުގެ މިސާލު ދައްކައިގެން ހިތްވަރުދިނުމަށް މަސައްކަތްތަކެއް ވެސް އެޕާޓީން ކޮށްފައިވާ ކަމަށެވެ.

"މިއީ ރޭވިގެން ކުރި ކަމެއް. އެ ކުރި ގޮތެއް ބަލަން ފުލުހުން އެވަނީ ފަށާފައި، ފުލުހުން ކުރާނީ ޕްރޮފެޝަނަލް މަސައްކަތް. މި ސަރުކާރުން ފުލުހުންގެ އިދާރާއަކަށް އަދި ސިފައިންގެ އިދާރާއަކަށް ސިޔާސީ ނުފޫޒެއް ނުފޯރުވާނެ. އެއީ އަޅުގަނޑު ކުރާނެ ކަމެއް ނޫން. އެ ބޭފުޅުން ކުރާ ޕްރޮފެޝަނަލް މަސައްކަތުން ފެންނަ ކަމެއް ފެނުނީމާ، އެ ދާނީ ރައްޔިތުންނާ ވެސް ހިއްސާ ކުރަމުން" ރައީސް ވިދާޅުވިއެވެ.

މީގެ އިތުރުން ސަލާމަތް ބުއްދި ހުރި ކޮންމެ މީހަކު ވިސްނާލުމުން ވެސް މިއީ ބަޣާވާތެއްކަން ވިސްނޭނެކަމަށް ރައީސް ވިދާޅުވި އެވެ.

"އެހެންވީމާ ސަރުކާރު ގައިރު ގާނޫނީ ގޮތަށް ބަދަލު ކުރުމަށް، އަދި އެ ނޫން ވެސް ގައިރު ގާނޫނީ ގޮތަކަށް ރައްޔިތުންގެ ނިންމުން ބަދަލުކުރަން ކުރާ މަސައްކަތް، ގާނޫނުއަސާސީގައި އޮންނަ ގޮތަކަށް ކުރަން ޖެހޭ ކޮންމެ ކަމެއް ކުރުމުގައި ފުރިހަމަ ބާރާއި އެކުގައި، ގާނޫނުއަސާސީގައި އޮންނަ ގޮތަށް ހުރިހާ ކަމެއް އަޅުގަނޑުމެން ކުރާނަން." ރައީސް ވިދާޅުވި އެވެ.

ރައީސް އިތުރަށް ވިދާޅުވީ ބީއެމްއެލްގެ ބޯޑުގައި ތިއްބެވި ޑިރެކްޓަރުންގެ ތެރެއިން ސަރުކާރަށް ނިސްބަތްވަނީ ހަތަރު ޑިރެކްޓަރުން ކަމަށާއި، ބާކީ ފަސް ޑިރެކްޓަރުންނަކީ ސަރުކާރަށް ނިސްބަތްވާ ޑިރެކްޓަރުން ނޫން ކަމަށެވެ.

"ވަރަށް މީހުން ސުވާލު އުފެދިދާނެ، ދިވެހިންގެ ބޭންކު، ސަރުކާރުގެ މެޖޯރިޓީ ހިއްސާ އޮންނައިރު، ކިހިނެއްހޭ ތިވީ. އެތާ ތިބީ އަދި ސަރުކާރުގެ ހަތަރު ޑިރެކްޓަރުން. ދެން ތިބި ފަސް މީހުންނަކީ ސަރުކާރު ޑިރެކްޓަރުންނެއް ނޫން. އެހެންމާ އަދި ނެތް މެޖޯރިޓީއެއް" ރައީސް ވިދާޅުވިއެވެ.

މިއާއިއެކު، ސަރުކާރުގެ ފަރާތުން އައްޔަން އިތުރު ދެ ޑިރެކްޓަރުން އައްޔަން ކުރަން ނަން ފޮނުވާފައިވާ ކަމަށާއި، އެ ބޭފުޅުން އެ މަގާމަށް އައްޔަނު ކުރުމަށް އިތުރު ދެ ހަފުތާ ނަގާނެ ކަމަށް ރައީސް ވިދާޅުވިއެވެ.

މީގެއިތުރުން، ބީއެމްއެލްގެ ބޯޑަށް ޗެއާމަނަކު އައްޔަނު ކުރުމަށް ނަން ފޮނުވާފައިވާ ކަމަށާއި އެ ނަން އަދި ފާސްކުރެވިފައި ނުވާ ކަމަށް ވެސް ރައީސް ވިދާޅުވެފައެވެ. އެހެންކަމުން އިދިކޮޅު ފަރާތްތަކުން ބީއެމްއެލްގެ ބޯޑުގައި ސަރުކާރުގެ މެޖޯރިޓީ އޮތްކަމަށް ބުނެ ދައްކާ ވާހަކަތަކަކީ ދޮގު ވާހަކަތަކެއް ކަމަށް ރައީސް ވިދާޅުވި އެވެ.

ރައީސް އިތުރަށް ވިދާޅުވީ ބީއެމްއެލްގެ ބޯޑުގައި ހިމެނޭ ޕްރައިވެޓް ޑިރެކްޓަރުންގެ ތެރެއިން ޗަމްޕާ މުޙައްމަދު މޫސާ (އުއްޗު)އާއި ޗަމްޕާ ޙުސައިން އަފީފް އެމްޑީޕީން އިސްވެ ހިންގަން އުޅުނު ބަޣާވާތް ހުއްޓުވުމަށް ޓަކައި ވަރަށް ބޮޑު އެހީތެރިކަމެއް ދެއްވި ކަމަށާއި ބީއެމްއެލް ގެ އެނިންމުން ބާތިލް ކުރެވުނީ، އެ ބޭފުޅުން ރިޕްރެޒެންޓް ކުރާ ޑިރެކްޓަރުންނާ ވާހަކަ ދައްކަވައިގެންނާއި ކެބިނެޓުން ހުއްޓައިނުލައި މަސައްކަތް ކޮށްގެން ކަމަށެވެ.