ފިނިފެންމާ ލޯންޗް ގޮއްވާލި ހާދިސާއަކީ ޔާމީން ކުޅުނު ޑްރާމާއެއްގެ ގޮތުގައި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ މިރޭ ސިފަކޮށްފި އެވެ. 

ކުރީގެ ރައީސް ޔާމީން ހައްޖަށް ކުރެއްވި ދަތުރަށް ފަހު އެނބުރި މާލެ ވަޑައިގަތް ދުވަހު ޔާމީން އަވަހާރަކޮށްލުމަށް ފިނިފެންމާ ލޯންޗުގައި އެއްޗެއް ގޮއްވާލި ހާދިސާ އަކީ ޔާމީން ކުޅުއްވި ޑްރާމާއެއް ކަމަށް ސިފަކުރައްވާ އަބްދުއްރަހީމް ވިދާޅުވީ ޔާމީން މިހާރު ދައްކަވާ ވާހަކަތަކީ ކަނޑައެޅިގެން ދޮގު ވާހަކަތަކެއް ކަމަށެވެ.

އަބްދުއްރަހީމް ވިދާޅުވީ ޔާމީން މިހާރު ކައިރީގައި ގެންގުޅުއްވާ މީހުންނަކީ ކުރިން އެމަނިކުފާނަށް އަނިޔާދިން ކަމަށް ވިދާޅުވި މީހުން ކަމަށެވެ.

"އަޅުގަނޑަށް މިހާރު ބުނަން ކެރިދާނެ މި ފިނިފެންމާ ލޯންޗު ގޮވުން މިއީ ޔާމީން އިސްވެ ހުރެގެން ކުޅުނު ޑްރާމާއެއް ނޫން ބާއޭ. އެ ހިސާބަށް މިހާރު ޔާމީންގެ ވާހަކަ ހިނގައްޖެ،" އަބްދުއްރަހީމް ވިދާޅުވި އެވެ.

ސަންގު ޓީވީއަށް މިރޭ ދެއްވި އިންޓަވިއުއެއްގައި އަބްދުއްރަހީމް ވިދާޅުވި ފިނިފެންމާ ލޯންޗު ގޮވުމާއެކު ބޭރަށް ނިކުމެ ބެލިއިރު ރަސްމީ ފާލަން ކައިރީގައި ނޫކުލައިގެ ޓީޝާޓެއް ލައިގެންހުރި މީހަކު ހުރި ކަމަށާއި އެއީ އެކަން ކުރި މީހާކަން ވަގުތުން އެނގުނު ކަމަށް ރައީސް ޔާމީން ވިދާޅުވެފައިވާ ކަމަށެވެ.

އަބްދުއްރަހީމް ވިދާޅުވީ އެމީހަކީ މިހާރު ރައީސް ޔާމީންގެ އަރިހުގައި މަސައްކަތް ކުރައްވާ މާލޭ އޭރިއާގެ އޭރުގެ ކޮމާންޑަރު އަދި އެ މައްސަލާގައި ޖަލު ހުކުމެއް އިއްވި ކެޕްޓަން އަހުމަދު ފަޔާޒު (ޕާޕާ) އަށް އިޝާރާތްކޮށް އޭރު ވިދާޅުވި ވިދާޅުވުމެއް ކަމަށެވެ.

މީގެއިތުރުން އަބްދުއްރަހީމް ވިދާޅުވީ މިހާދިސާ ހިނގުމުގެ 6 މަސް ދުވަސް ކުރިން ފެށިގެން ރައީސް ޔާމީންއަށް އިންޓެލިޖެންސް މައުލޫމާތު ނުދޭކަމަށް އެމަނިކުފާނު ވިދާޅުވި ނަމަވެސް، މިހާރު އެމަނިކުފާނުގެ އެންމެ އަރިސްކޮށް އުޅޭ އެއްބޭފުޅަކީ އޭރުގެ ޕޮލިސް ކޮމިޝަނަރު ހުސައިން ވަހީދު އެވެ.

މިވާހަކަތަކާއި ގުޅުވައިގެން ނޫސްވެރިޔާ ވަނީ ލޯންޗު ގޮވި ހާދިސާގައި ކުރިން އެގޮތަށް ސުވާލު ނުއުފެދުނީ ކީއްވެތޯ އަބްދުއްރަހީމް އާއި ސުވާލު ކުރައްވާފަ އެވެ. މިސުވާލުގެ ޖަވާބުގައި އަބްދުއްރަޙީމް ވިދާޅުވީ އޭރު ތިބީ އެ ހާދިސާއާ ގުޅޭގޮތުން ރައީސްކަމުގެ ހުންނެވި މީހަކު ދައްކަވަމުން އައި ވާހަކަ ގަބޫލުކޮށްގެން ކަމަށާއި ޔާމީން މިހާރު އަމަލުކުރައްވަމުން ގެންދަވާ ގޮތާއި ދައްކަވަމުން ގެންދަވާ ވާހަކައާ އޭރު ދެއްކެވި ވާހަކަތަކާ ގުޅުވާލުމުން އެ ސުވާލު މިހާރު އުފެދެނީ ކަމަށެވެ.

އަބްދުއްރަހީމް އަކީ މިދިޔަ ރިޔާސީ އިންތިހާބު މިހާރުގެ ރައީސް މުހައްމަދު މުއިއްޒު ކާމިޔާބު ކުރައްވާ ވެރިކަން ބަދަލުވުމާ ހަމަޔަށް ވެސް ޔާމީންގެ އަރިހުގައި އެންމެ އިސްކޮށް މަސައްކަތް ކުރެއްވި ރައީސް ޔަމީންގެ އެއް އަތޭ ބުނުމަކުން ދޮގަކަށް ނުވާނެއެވެ. އެހެންނަމަވެސް މިރޭގެ އިންޓަވިއުގައި އަބްދުއްރަހީމް ވިދާޅުވީ ޔާމީންއަކީ ސިޔާސީ ގޮތުން "ތަންދޮރު ނުދަންނަ ބޭފުޅެއް" ކަމަށާއި ވެރިކަމުގެ ދަހިވެތިކަމުގައި އުޅުއްވާ ބޮޑާ ކިބުރުވެރި ބޭފުޅެއް ކަމަށެވެ.