ކޫރިއަރ މެދުވެރިކޮށް ރާއްޖެ އެތެރެ ކުރަން އުޅުނު ޖުމްލަ 11.62  ކިލޯގްރާމްގެ މަސްތުވާތަކެތި އަތުލައިގަނެފިއެވެ.

މޯލްޑިވްސް ކަސްޓަމްސް ސާވިސްއިން ވިދާޅުވީ ކޫރިއަރ މެދުވެރިކޮށް ރާއްޖެއަށް ގެނެސްފައިވާ ޕާރުސަލަކާއި ވައިގެމަގުން ރާއްޖެ ގެނެސްފައިވާ ޝިޕްމަންޓެއް ބަލައި ފާސްކުރުމުގެ ތެރޭގައި ޝައްކުކުރެވޭ ޒާތުގެ ބާވަތްތަކެއް ހުރުމުން، އިތުރަށް ބަލާ ފާސްކުރުމުގެ ތެރޭގައި މިތަކެތި އަތުލައިގަނެފައިވާ ކަމަށެވެ.

ކަސްޓަމްސް އިން ހާމަކޮށްފައިވާ ގޮތުގައި ކޫރިއަރ މެދުވެރިކޮށް އޮގަސްޓް 14 ވަނަ ދުވަހު ރާއްޖެ ގެނެސްފައިވާ ޕެކޭޖެއް ބަލާ ފާސްކުރުމުން އެ ޕެކޭޖުގެ ތެރެއިން މަސްތުވާތަކެތި ކަމަށް ޝައްކުކުރެވޭ ތަކެތި ފެނިފައިވާ ކަމަށާއި އަދި ފުރަތަމަ މަރުހަލާގައި ކަސްޓަމްސް އިން މި ތަކެތި ތަޙުލީލުކުރިއިރު، މަސްތުވާތަކެތީގެ ބާވަތެއް ކަމަށްވާ ސިންތެޓިކް ކެތިނޯން އަށް މިތަކެތި ފައްސިވެފައިވާ ކަމަށެވެ.

Advertisement

މީގެއިތުރުން، ލަފާކުރެވޭ ގޮތުގައި މިތަކެތީގެ މަގުމަތީ އަގު 960,000.00  ނުވަ ލައްކަ ފަސްދޮޅަސް ހާސް ދިވެހި ރުފިޔާއަށް އަރާނެ ކަމަށްވެސް ކަސްޓަމްސް އިން ބުނެފައިވެ އެވެ.

މިތަކެތީގެ އިތުރުން، ވައިގެމަގުން އޯގަސްޓް 19 ވަނަ ދުވަހު ރާއްޖެ އެތެރެކޮށްފައިވާ ޝިޕްމަންޓެއް ބަލައިފާސް ކުރުމުން، މަސްތުވާތަކެތި ފޮރުވާފައި ހުރިކަމަށް ކަސްޓަމްސްއަށް ޝައްކުކުރެވިގެން، އިތުރަށް ބެލިބެލުމުން މަސްތުވާތަކެތި ކަމަށް ޝައްކުކުރެވޭ ތަކެތި ފެނިފައިވާ ކަމަށް ވެސް ކަސްޓަމަސް އިން ބުނެފައިވެ އެވެ.

ފުރަތަމަ މަރުހަލާގައި މިތަކެތި ތަޙުލީލު ކުރުމުން މަސްތުވާތަކެތީގެ ބާވަތެއް ކަމަށްވާ ހެރޮއިން އަދި ކެނެބިސްއަށް ފައްސިވެފައިވާ ކަމަށް ކަސްޓަމްސް އިން ބުނެފައިވެ އެވެ. އެގޮތުން ހެރޮއިންއަށް ފައްސިވި ތަކެތީގެ ބަރުދަނުގައި ޕެކިންއާއި އެކު 740 ގްރާމް އާއި، ކެނެބިސް އަށް ފައްސިވި ތަކެތީގެ ބަރުދަނުގައި ޕެކިންއާއި އެކު 10,200  ގްރާމް ހުރިކަމަށާއި، ލަފާ ކުރެވޭ ގޮތުގައި މިތަކެތީގެ މަގުމަތީ އަގަކީ 8,900,000.00  އަށް މިލިއަން ނުވަލައްކަ ދިވެހި ރުފިޔާކަމަށް ވެސް ކަސްޓަމްސް އިން ބުނެފައިވެ އެވެ.

ކަސްޓަމްސް އިން ހާމަކޮށްފައިވާ ގޮތުގައި މިމައްސަލަތަކުގައި އަތުލައިގަނެފައިވާ މަސްތުވާތަކެތީގެ ބަރުދަނުގައި ޖުމްލަ 11.62 ކިލޯގްރާމް ހުންނާނެ އެވެ.

މިމައްސަލާ އާއި ގުޅިގެން ފުލުހުން ބުނެފައި ވަނީ މި މައްސަލަތައް އިތުރަށް ތަހްގީގު ކުރުމަށް، އަތުލައިގަނެވުނު މަސްތުވާތަކެތި މިހާރު ފުލުހުންނާއި ޙަވާލުކުރެވިފައިވާ ކަމަށެވެ.