ފެނަކަ ކޯޕަރޭޝަންގެ ހުރިހާ ހިއްސާއެއް އެސްޓީއޯއިން ގަނެ ފެނަކައަކީ އެސްޓީއޯގެ ސަބްސިޑަރީ ކުންފުންޏަކަށް ބަދަލުކުރުމުން ފެނަކަ ކުންފުނީގެ މާލީ ހާލަތު ރަނގަޅުކޮށް، ފައިދާވާ ކުންފުންޏަކަށް ހެދޭނެ ކަމަށް އެސްޓީއޯގެ ސީއީއޯ ޝިމާދު އިބްރާހިމް މިއަދު ވިދާޅުވެއްޖެ އެވެ.

މިއަދު ނޫސްވެރިންނާއި ބައްދަލުކުރައްވާ ޝިމާދު ވިދާޅުވީ އެސްޓިއޯއިން މިމަހުގެ 15 ގައި ފެނަކަ ކުންފުނި ގަތުމަށް ފިނޭންސް މިނިސްޓްރީއަށް ޕްރޮޕޯސަލެއް ހުށަހަޅާފައިވާ ކަމަށާއި މިހަފްތާގައި ސަރުކާރުން އެޕްރޮޕޯސަލް ގަބޫލު ކޮށްފައިވާ ކަމަށެވެ.

ޝިމާދު ވިދާޅުވީ އަންނަ ޖެނުއަރީ މަހުން ފެށިގެން އެސްޓީއޯގެ ދަށުން ފެނަކަ ކުންފުނިން ހިންގަން ފެށުމުން ފެނަކައިގެ މާލީ ހާލަތު ރަނގަޅުކޮށް، ކުންފުންޏަކީ ފައިދާވާ ކުންފުންޏަކަށް ހެދުމަށް ވަރަށް ބޮޑަށް ފަސޭހަވާނެ ކަމަށެވެ.

ފެނަކަ އެސްޓިއޯގެ ދަށަށް ބަދަލުކުރުމަށް އެކުލަވާލާ އިންޓަރިމް ބޯޑުގައި ފިނޭންސް މިނިސްޓްރީ އާއި އެސްޓީއޯ އާއި އެންވަޔަރުމަންޓް މިނިސްޓްރީން ކަނޑައަޅާ ބޭފުޅުން ހިމެނޭ އިރު ފެނަކަ އެސްޓީއޯގެ ދަށަށް އެއްކޮށް ބަދަލުވުމުން އެކުންފުނީގެ ބޯޑު އެކުލަވައިލާނީ އެސްޓީއޯގެ ގަވަނަންސް ކޯޑާއި ސަބްސިޑަރީތަކަށް މެންބަރުން އައްޔަނުކުރާ އުސޫލުގެ ދަށުން ކަމަށް ވެސް އޭނާ ވިދާޅުވި އެވެ.

މީގެއިތުރުން އެސްޓީއޯއަކީ ރާއްޖެއަށް އެންމެ ގިނައިން ތެޔޮ އެތެރެ ކުރާ ކުންފުނި ކަމަށްވާތީ ފެނަކައިން ކަރަންޓު އުފެއްދުމަށް ބޭނުންވާ ޑީސަލް ފޯރުކޮށްދެނީ އެ ކުންފުނިން ކަމަށް ވެސް ޝިމާދު ވިދާޅުވި އެވެ.

"އެހެންވީމަ އަޅުގަނޑުމެންނަށް އެބަ ފެނޭ ފެނަކަ އާއި އެސްޓީއޯ ގުޅިގެން ވަރަށް ބޮޑު ސިނާޖީއެއް [ދެ ކުންފުންޏަށް ފައިސާ ބޮޑުވާނެ ގޮތެއް]. މުސްތަގްބަލުގައި އަޅުގަނޑުމެން ރާވާފައިވަނީ ޑީސަލްގެ ބަދަލުގައި ވަކި ޕްލޭނެއްގެ ދަށުން ރިނުވަބަލް އެނާޖީއަށް ދާން،" އޭނާ ވިދާޅުވި އެވެ.

އެސްޓީއޯއަކީ މިހާރު ވެސް ގިނަ އަދަދެއްގެ ސަބްސިޑަރީ ކުންފުނިތައް ހިންގާ ކުންފުންޏަކަށް ވާއިރު، އެ ތަޖުރިބާގެ ބޭނުންކޮށްގެން ފެނަކައަށް ވެސް ފައިދާތަކެއް ހޯދޭނެ ކަމުގެ ޔަގީންކަން ދެއްވަމުން ޝިމާދު ވިދާޅުވީ ކުރިއަށް އޮތް ތިން އަހަރުގެ ތެރޭގައި ފެނަކައިން އެސްޓީއޯއަށް ފައިދާ ލިބޭނެ ކަމަށެވެ.

މީގެއިތުރުން ޝިމާދު ވިދާޅުވީ އެސްޓިއޯއަށް އެންމެ ބޮޑު އަދަދަކަށް ފައިސާ ދައްކަން ޖެހިފައި އިތް އެއް ކުންފުންޏަކީ ފެނަކަ ކަމަށެވެ. އެގޮތުން ފެނަކައިން ތެޔޮ ގަނެގެން އެސްޓީއޯއަށް ދެ ބިލިއަން ރުފިޔާ ދައްކަން އެބަ އޮތް ކަމަށާއި އެހެން ފަރާތްތަކަށް ދައްކަން ޖެހޭ ފައިސާއާ އެކު ފެނަކައިގެ ދަރަނި 4.1 ބިލިއަން ރުފިޔާއަށް އަރާ ކަމަށެވެ.

"ދަރަނި އިތުރުވީ ވަކި ހިސާބަކުން އައިސް ފެނަކައިން އެސްޓީއޯއަށް ޕޭމެންޓް ދިނުން ހުއްޓާލުމުން. އެކަމަކު އާ މެނޭޖްމެންޓުން އެކޮޅަށް ދެއްކޭ ވަރަކަށް ވަކި ޕްލޭނެއްގެ ދަށުން ޕޭމެންޓްތައް ލިބޭ. އަޅުގަނޑުމެންނަށް ގަބޫލު ކުރެވެނީ އެސްޓީއޯގެ ދަށަށް ފެނަކަ ބަދަލު ކުރެވިގެން އެފިޝެންސީ އާއި ކުޑަކުރެވޭ ކޮސްޓުން އަޅުގަނޑުމެންނަށް ދަރަނީގެ ބޮޑު ބައި ދިގު ރާސްތާއެއްގައި ރިކަވާ ކުރެވޭނެ ކަމަށް،" އޭނާ ވިދާޅުވި އެވެ.

ޝިމާދު ވިދާޅުވީ އެސްޓިއޯގެ ދަށަށް ފެނަކަ ގެނެވުމާއިއެކު އެ ކުންފުނީގެ ހަރަދުތައް ކުޑަ ކުރާނެ ކަމަށާއި ފެނަކައަށް އެންމެ ރަނގަޅު ސްޓްރަކްޗާއަކަށް ބަދަލު ކުރާނެ ކަމަށެވެ.

"ރައިޓް ސައިޒު ބަލަން ޖެހޭ. މިހާރު ފެނަކައިގަ އެބަތިބި 7،000 އަށް ވުރެ ގިނަ މުވައްޒަފުން. އެއްފަހަރާ ގޮސް މުވައްޒަފުން ކަނޑާލާ ވާހަކައެއް ނޫން. ދެން އަޅުގަނޑުމެން ބަލާނަން މުވައްޒަފުންނަށް ރަނގަޅު އެހެން ގޮތްތައް ވޭތޯ،" އޭނާ ވިދާޅުވި އެވެ.