ކ.ތިލަފުށީގައި ސްލޯޕިން މަސައްކަތަށް ފަޅުތެރޭގައި ހުރި އުޅަނދުތައް ނެގުމަށް އަންގައިފިއެވެ.

ހައުސިން ޑިވެލޮޕްމެންޓް ކޯޕަރޭޝަނުން އާއްމުކޮށްފައިވާ އިއުލާނެއްގައި ބުނެފައިވަނީ ތިލަފުށި ތަރައްގީ ކުރުމަށް ހިއްކަން ޖެހޭ ސަރަހައްދުތައް ހިއްކުމަށްފަހު ސްލޯޕިން މަސައްކަތް ކުރަމުންދާތީ އެ ސަރަހައްދުގެ ފަޅުތެރޭގައި އަޅާފައިވާ އުޅަނދުތައް ނަގަން ބޭނުންވާ ކަމަށެވެ.

އެޗްޑީސީ އިން ވަނީ  28 އޯގަސްޓް އިން ފެށިގެން ރަސްމީ ހަތް ދުވަހުގެ ތެރޭގައި އެސަރަހައްދުގައި އަޅާފައިވާ އުޅަނދުތައް ނެގުމަށް އަންގާފައެވެ. މިމުއްދަތުގެ ތެރޭގައި އެއުޅަނދުތައް ނަގާފައި ނުވާނަމަ އެޗްޑީސީގެ އުސޫލު ނަންބަރު G-7/2023 "ކ.ތިލަފުއްޓާއި ކ.ގުޅީ ފަޅުތެރެޔަށް ދޫކޮށްލާފައިވާ އުޅަނދުފަހަރާއި ތަކެއްޗާއިމެދު އަމަލުކުރުމުގެ އުސޫލު"ގެ ދަށުން ފިޔަވަޅު އަޅާނެ ކަމަށް ވެސް އެޗްޑީސީ އިން ބުނެފައިވެއެވެ.

Advertisement

މީގެއިތުރުން، އެޗްޑީސީ އިން ވަނީ މިކަމާ ގުޅޭގޮތުން އިތުރު މައުލޫމާތު ސާފުކުރަން ބޭނުންވާ ކަމުގައިވާ ނަމަ އެޗްޑީސީގެ ހޮޓްލައިން 1516 އަށް ގުޅުއްވައިގެން މައުލޫމާތު ސާފު ކުރުމަށް އެދިފައެވެ.

ވިޔަފާރިވެރިންނަށް ފުރުސަތު ފަހިކޮށްދިނުމުގެ ގޮތުން އެޗްޑީސީ އިން ކުރިއަށް ގެންދާ ތިލަފުށި ހިއްކައި ތަރައްގީ ކުރުމުގެ މަޝްރޫއަށް ވިޔަފާރިވެރިންގެ ފަރާތުން ލިބޭ އެއްބާރުލުން ފާހަގަކޮށް ޝުކުރު ދަންނަވަމުން އެޗްޑީސީ އިން ވަނީ ހުރިހާ ފާރާތްތަކުން ވެސް މިމަސައްކަތުގައި އެއްބާރުލުން ދިނުމަށް އެދިފައެވެ.