ރާއްޖެ އެތެރެކުރަން އުޅުނު އެއް މިލިއަން ރުފިޔާގެ މަސްތުވާތަކެތި އަތުލައިގަނެފި އެވެ.

ކަސްޓަމްސް އިން ހާމަކޮށްފައިވާ ގޮތުގައި މިމަހުގެ 20 ވަނަ ދުވަހު ރަބަރު ޕެކެޓެއްގައި ބަންދުކޮށްގެން ޕޯސްޓް މެދުވެރިކޮށް އެތެރެކުރަން އުޅުނު 666 ގްރާމްގެ މަސްތުވާތަކެތި ވަނީ އަތުލައިގެންފިއެވެ.

އަތުލައިގަނެފައި ވަނީ ސިންތެޓިކް ކެތިނޯން ނަމަކަށް ކިޔާ މަސްތުވާތަކެތީ ބާވަތެއް ކަމަށާއި އެތަކެތީގެ މަގުމަތީގެ އަގަކީ އެއް މިލިއަން ރުފިޔާ ކަމަށް ކަސްޓަމްސް އިން ބުނެފައިވެ އެވެ.

Advertisement

ކަސްޓަމްސް އިން ހާމަކޮށްފައިވާ ގޮތުގައި މިމަހުގެ 14 ވަނަ ދުވަހުވެސް ވައިގެ މަގުން 680 ގްރާމްގެ ކެތިނޯން ރާއްޖެއަށް އެތެރެ ކުރަން އުޅެނިކޮށް އަތުލައިގަނެފައިވާ ކަމަށާއި މި މަހުގެ 19 ވަނަ ދުވަހު 10.20 ކިލޯގެ ކެނެބިސް އާއި 740 ގްރާމްގެ ހިރޮއިން ވެސް ވައިގެ މަގުން ރާއްޖެއަށް އެތެރެ ކުރަން އުޅެނިކޮށް ވަނީ އަތުލައިގަނެފައެވެ.

ކަސްޓަމްސްގެ ތަފާސް ހިސާބުތަކުން ދައްކާ ގޮތުގައި މިއަހަރުގެ ޖުލައި މަހުގެ ނިޔަލަށް 64.84 ކިލޯގެ މަސްތުވާތަކެތި ވަނީ އަތުލައިގަނެފައިވާއިރު އޭގެ ލަފާކުރާ މަގުމަތީ އަގު 106،358،952 ދިވެހި ރުފިޔާއަށް އަރާނެ އެވެ.