މާލޭގައި އަންހެނަކު ރަހީނުކޮށްގެން ވަޅިން ބިރުދެއްކި ފިރިހެން މީހާ ހައްޔަރުކޮށްފި އެވެ.

މާފަންނު ގެއެއްގެ ތެރޭގައި އަންހެނަކު ބަންދު ކޮށްފައި ހުރި ކަމަށް ތުހުމަތު ކުރެވޭ މައްސަލައަކާ ގުޅިގެން ފުލުހުން ހަރަކާތްތެރިވަމުން އަންނަ ކަމަށް ފުލުހުން ފުރަތަމަ ބުނެފައިވެ އެވެ.

މިހާދިސާގެ ވީޑިއޯތައް ސޯޝަލް މީޑިއާގައި އާންމުވެފައިވާއިރު، ވީޑިއޯއިން ފެންނަ ގޮތުގައި ފިރިހެނަކު ހުރީ މާސްކެއް އަޅައިގެން ހުރި އަންހެނެއްގެ ކަރުގަ ވަޅިއެއް ޖައްސައިގެންނެވެ. އޭނާ ހުއްޓުވުމަށް އެގޭ ދޮރުމަތީ ފުލުހުން ހަރަކާތްތެރިވަމުންދާ ތަން ފެންނައިރު، ފަހުން އާންމު ވީޑިއޯގައި އަންހެން މީހާގެ ކަރުގައި ވަޅި ޖައްސައިގެން ހުރެ ސައިކަލަށް އަރައިގެން ތިބޭ ތަން ފެނެއެވެ.

Advertisement

އަންހެން މިހާ ސައިކަލުގެ ކުރީގައި ބައިންދައިގެން، އޭނާގެ ކަރުގައި ވަޅި ޖައްސައިގެން ހުރި މަންޒަރު ފެނިގެންދެއެވެ. އަދި އެއަށްފަހު، ފުލުހުން ވަރަށް ހުށިޔާރު ކަމާއިއެކު މުގުރަކުން އޭނާގެ ގައިގައި ޖަހައި ސައިކަލާ އެކު އޭނާ ބިންމައްޗަށް ވައްޓާލައި ތަންވެސް ފެނިގެންދެއެވެ. އަދި އެއަށްފަހު ގިނަ އަދަދެއްގެ ފުލުހުން ހަރަކާތްތެރިވެގެން އޭނާ ހައްޔަރުކުރާތަން ވެސް ފެނިގެންދެއެވެ.

މިމައްސަލަ އާއި ގުޅިގެން ފުލުހުން ބުނެފައިވަނީ އަންހެން މީހާ ސަލާމަތް ކުރުމަށްޓަކައި ބާރުގެ ބޭނުން ކުރަން މަޖުބޫރުވީ ކަމަށާއި އެކަމުގެ ތެރެއިން ދެ މީހުންނަށް ވެސް އަނިޔާވެގެން ފަރުވާ ދިނުމަށް ހޮސްޕިޓަލަށް ގެންގޮސްފައިވާ ކަމަށެވެ.

ފިރިހެން މީހާ އަށް އޭޑީކޭ ހޮސްޕިޓަލުގައި ފަރުވާދެމުންދާ އިރު، ރަހީނު ކުރި އަންހެން މީހާއަށް ދަނީ އައިޖީއެމްއެޗް ގައި ފަރުވާ ދެމުންނެވެ.