ނެޓްވޯކް އަޕްގްރޭޑް ކުރުމުގެ މަސައްކަތް ރާއްޖޭގެ 15 ރަށެއްގައި ވަރަށް އަވަހަށް ފެށިގެންދާނެ ކަމަށް ފެނަކަ ކޯޕަރޭޝަންގެ އެމްޑީ މުއާޒު މުހައްމަދު ރަޝީދު ވިދާޅުވެއްޖެއެވެ.

ޕީއެސްއެމްގެ "ރާއްޖެ މިއަދު" ޕްރޮގްރާމުގައި ވާހަކަފުޅު ދައްކަވަމުން މުއާޒް ވިދާޅުވީ ރަށްރަށުގެ އާންމު ހާލަތު އެހާ ބޮޑަށް ގޯސްވެފައި ވަނީ ކުރީ ސަރުކާރުން މެއިންޓެނެންސް މަސައްކަތް ކޮށްފައިވާ ނުވާތީވެ ކަމަށާއި، މިސަރުކާރުން ބާރު ސްޕީޑްގައި އަޕްގްރޭޑިން މަސައްކަތް ކުރަމުންދާ ކަމަށެވެ. އަދި އެގޮތުން 15 ރަށެއްގެ ނެޓްވޯކް އަޕްގްރޭޑިން މަސައްކަތް ވަރަށް އަވަހަށް ފެށިގެންދާނެ ކަމަށް މުއާޒު ވިދާޅުވި އެވެ.

" 15 ރަށުގެ ނެޓްވޯކް އަޕްގްރޭޑުކުރުމުގެ މަސައްކަތްކުރުމަށްވަނީ ރާވާފައި، އޭގެތެރޭގައި ތުޅާދޫ ހިންނަވަރު ފަދަ ރަށްތައް ހިމެނޭ، އެރަށްތަކުގެ އިތުރަށް ވެސް ލިސްޓުތައް ތަރުތީބުކޮށްގެން މަސައްކަތްތައް ކުރަމުން މިދަނީ." މުޢާޒު ވިދާޅުވިއެވެ

Advertisement

މީގެއިތުރުން، މިހާރުވެސް ހާލަތު ގޯސް ރަށްތަކަށް 47 ޖެންސެޓު ފޯރުކޮށްދީފައިވާކަން ފާހަގަކުރައްވާ މުއާޒު ވިދާޅުވީ އަދިވެސް ހާލަތު ގޯސް ރަށްތައް އެބަހުރި ކަމަށާއި އެ ރަށްތަކަށް ޖަނަރޭޓަރު ހޯދުމުގެ މަސައްކަތް މިހާރު ކުރިއަށްދާ ކަމަށެވެ.

މުއާޒު ވިދާޅުވީ ފެނަކައިން މިހާރު މަސައްކަތް ކުރަމުން ދަނީ އަންނަ ރަމަޟާން މަހުގެ ކުރިން ނެޓްވޯކް އަޕްގްރޭޑިންގެ މަސައްކަތް ނިންމާލެވޭތޯ އެވެ.

"މިހާރު މަސައްކަތްކުރަމުން މިދަނީ އަންނަ ރަމަޟާން މަހަށް ތައްޔާރުވުމުގެގޮތުން ކޮންމެހެން ބޭނުންވާ 45 ވަރަކަށް ޖެނެރޭޓަރާއި އަދި މުހިއްމު ސްޕެއަރތައް އޯވަރހޯލްކުރުމަށް ބޭނުންވާ ސްޕެއަރތަކާއި އެކީގައި ހޯދުމުގެ މަސައްކަތްކުރަމުން މިދަނީ." މުޢާޒު ވިދާޅުވިއެވެ.

މިހާރު ރަށްރަށުގައި ބޭނުން ކުރަމުން އަންނަ މުސްކުޅި ނެޓްވޯކް ބަދަލުކުރުމުގެ މައިގަނޑު މަޤްޞަދަކީ ކަރަންޓް ބިލު ބޮޑުވުމުގެ މައްސަލައަށް ހައްލެއް ހޯދުންކަމަށް ފެނަކައިން ބުނެފައިވެއެވެ.

މިހާރު ބޭނުންކުރަމުންދާ މުސްކުޅި ނެޓްވޯކުގެ ސަބަބުން 15 ޕަސެންޓް ގްރިޑް ގެއްލެމުންދޭ ކަމަށާއި އެހެންކަމުން ބައިނަލްއަޤްވަމީ މިންގަނޑުތަކަށް މި ނެޓްވޯކް އަޕްގްރޭޑް ކުރަން ޖެހޭ ކަމަށެވެ. އަދި މިކަން ކުރެވުމުން ކަރަންޓް އުފެއްދުމަށް ޚަރަދުވާ މިންގަނޑު ބޮޑުތަނުން ކުޑަވެގެންދާނެ ކަމަށް މުއާޒް ވިދާޅުވި އެވެ.