ކޮވިޑް-19 ގެ ބަލިމަޑުކަމުގެ ސަބަބުން ލަގްޒަރީ ލައިނަރގެ ސިނާއަތް ދަށްވެފައި ވިޔަސް ކްރޫޒް ބުކިންތައް އަލުން އިތުރުވަމުންދާއިރު، ފިންލޭންޑްގެ ޝިޕްޔާޑަކުން ދަނީ ދުނިޔޭގެ އެންމެ ބޮޑު ކްރޫޒް ޝިޕްގެ ދަތުރުތަށް ފެށުމަށް ވާންޖެހޭ ތައްޔާރީތަށް ވަމުން ނެވެ.

ފިންލޭންޑްގެ ހުޅަނގު ދެކުނު އައްސޭރީގައި އޮންނަ ޓާކު ޝިޕްޔާޑްގައި ރޯޔަލް ކެރިބިއަންގެ ލަގްޒަރީގެ އާ އުޅަނދު އައިކޮން އޮފް ދަ ސީސް ނިމުމާ ގާތްވެފައިވާއިރު، ފުރަތަމަ ދަތުރު ކުރަން ހަމަޖެހިފައިވަނީ 2024 ވަނަ އަހަރުގެ ޖެނުއަރީ މަހު އެވެ.

"މި ބޯޓަކީ މިއަދުގެ ނިޔަލަށް، އަޅުގަނޑުމެންނަށް އެނގިފައިވާ ގޮތުގައި، ދުނިޔޭގެ އެންމެ ބޮޑު ކްރޫޒް ބޯޓް،" ޓަރކޫގެ ސީއީއޯ ޓިމް މޭޔަރ ވިދާޅުވި އެވެ.

ބޯޓަކަށް ވުރެ ބޮޑަށް ރަށަކާ ވައްތަރު މި ބޮޑު އުޅަނދުގައި ކުލަކުލައިގެ ވޯޓާޕާކްތަކާއި 20 އަށް ވުރެ ގިނަ ޑެކް ހުންނައިރު ގާތްގަނޑަކަށް 10،000 މީހުން އުފުލޭނެ އެވެ.

2021 ވަނަ އަހަރު ހަދަން ފެށި އަދި ޖޫން މަހު ކަނޑުގެ ޓްރައިލްތަކަށް ވަދެފައިވާ މިބޯޓުގެ ހާއްސަ ސިފައަކީ ކުރިމަތީ ބައިގެ ބައެއް ނިވާކޮށްފައިވާ ބޮޑު ބިއްލޫރި ޑޯމެ އެވެ.

ކޮވިޑް-19ގެ ބަލިމަޑުކަމުގެ ސަބަބުން ސިނާއަތަށް ބޮޑު ގެއްލުމެއް ދިނުމުން، އެ ސިނާއަތް ދުވަހަކުވެސް ރަނގަޅުވާނެތޯ ސުވާލު އުފެދެ އެވެ.

ކްރޫޒް ކުންފުނިތަކުން މިހާރު ފެންނަމުންދަނީ ކަސްޓަމަރުން އެނބުރި އަންނަތަނެވެ.

ކްރޫޒް ލައިންސް އިންޓަނޭޝަނަލް އެސޯސިއޭޝަނުން ލަފާކޮށްފައިވާ ގޮތުގައި 2023 ވަނަ އަހަރު ފަސިންޖަރުންގެ އަދަދު 31.5 މިލިއަން ފަސިންޖަރުންނާ އެކު ޕްރީ ޕެންޑެމިކް ލެވެލް އަށް ވުރެ މައްޗަށް އަރާނެ އެވެ.

"އެ ހުރަސްތައް ނެތިގެން ގޮސް ހާލަތު ލުއިވެގެން ދިޔަ ފަހުން އަޅުގަނޑުމެންނަށް ފެންނަނީ މާކެޓް އަނބުރާ އަންނަނީ ވަރަށް ވަރުގަދަކޮށް،" މޭޔަރ ވިދާޅުވި އެވެ.

އައިކޮން އޮފް ދަ ސީސް އިން 250،800 ގެ ޖުމްލަ ޓަނޭޖަކާއެކު (ޓައިޓެނިކްގެ ފަސްގުނަ ބޮޑު) ދުނިޔޭގެ އެންމެ ބޮޑު ކްރޫޒް ޝިޕްގެ ލަގަބު ރޯޔަލް ކެރިބިއަންގެ މިހާރުގެ ފްލެގްޝިޕް ވަންޑަރ އޮފް ދަ ސީސް އަތުން ފޭރިގަންނާނެއެެވެ.