އަމިއްލަ ދަތުރުފުޅުތަކަށް ދައުލަތުގެ ފައިސާ ހަރަދު ނުކުރައްވާ ކަމަށާއި ކުރިއަށް އޮތް ތަނުގައި ވެސް ނުކުރައްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެ އެވެ.

ސަންގުޓީވީއަށް ދެއްވި އިންޓަވިއުއެއްގައި ވާހަކަފުޅު ދައްކަވަމުން ރައީސް ޑރ. މުޢިއްޒު ވިދާޅުވީ އުސޫލުގައި ކަނޑައަޅުއްވާފައިވާ ގޮތުގައި ރައީސަކު އަމިއްލަ ދަތުރުފުޅެއް ކުރައްވާނަމަ މުލިއާގެ ބަޖެޓުން އެކަމަށް ހަރަދު ކުރެވޭނެ އެވެ. އެހެންނަމަވެސް މިހާތަނަށް އެއްވެސް ދަތުރުފުޅަކަށް ދައުލަތުގެ ފައިސާއިން ހަރަދު ކޮށްފައި ނުވާނެ ކަމަށް ރައީސް ވިދާޅުވި އެވެ.

މީގެއިތުރުން ރައީސް ވިދާޅުވީ މުލިއާގެ ބަޖެޓުން އެ ހަރަދުތައް ކުރެވެން އޮތް ފުރުސަތު ބޭނުން ނުކުރައްވާނެ ކަމަށާއި އެމަނިކުފާނަކީ ކިރިޔާ ވެސް އަމިއްލަފުޅަށް ވާން އޮތް ކަމެއް އަމިއްލަފުޅަށް ކުރައްވާ ބޭފުޅެއް ކަމަށެވެ.

Advertisement

"މިއަދާއި ހަމައަށް އަޅުގަނޑުގެ އަމިއްލަ ދަތުރެއްގައި، ޓިކެޓު ވިއަސް، އެކޮމޮޑޭޝަން ވިއަސް އެއްވެސް ހަރަދެއް އަޅުގަނޑުގެ ވެސް އަޅުގަނޑުގެ އަންހެނުންގެ ވެސް ކުދިންގެ ވެސް... އެއްވެސް މީހެއްގެ ހަރަދެއް އަޅުގަނޑުގެ އަމިއްލަ ދަތުރެއްގައި ނުހުންނާނެ އަމިއްލައަށް ނޫނިއްޔާ ކޮށްފައެއް" ރައީސް ވިދާޅުވިއެވެ.

"އަޅުގަނޑުމީ ކިރިޔާ ވެސް އަމިއްލައަށް ވާން އޮތީ އެކަމެއް އަމިއްލައަށް ކުރާ މީހެއް" ރައީސް ވިދާޅުވިއެވެ.

މީގެއިތުރުން ރައީސް ވިދާޅުވީ ދިމްޔާތުގައި އެމަނިކުފާނު ދިރިއުޅުއްވި މަސްތަކުގައި ވެސް ހުރިހާ ހަރަދެއް ކުރައްވާފައި ވާނީ އެމަނިކުފާނު އަމިއްލަފުޅަށް ކަމަށެވެ. އެހެންނަމަވެސް އެކަމާއި ގުޅިގެން ވެސް އެމަނިކުފާނުގެ މައްޗަށް ވަރަށް ގިނަ ތުހުމަތުތަކެއް ކޮށްފައިވާ ކަމަށް ރައީސް ވިދާޅުވި އެވެ.

"ވަރަށް ގިނަ އެލިގޭޝަންސްތައް އައި. މުލިއާގޭ ބަޖެޓުންނޭ ހަރަދު ކުރީ. ނޫނީ ފަހުން ބިލު ކުރީއޭ. ނޫން. ނުވެސް ކުރާނަން. އަޅުގަނޑު އަމިއްލައަށް ހުރިހާ ހަރަދެއް ކުރީ. އަޅުގަނޑުމެންގެ ސެކިއުރިޓީ ސެޓަޕް ހަދައިގެން ހުރިހާ ކުއްޔަށް ދޭ ކޮޓަރިތައް ހަމަޖެއްސީ ވެސް އަމިއްލައަށް." ރައީސް ވިދާޅުވިއެވެ.