އިމިގްރޭޝަނާއި ފިލަންވެގެން ކުޅުދުއްފުޓަށް ދިޔަ ބޯޓެއްގައި ދަތުރުކުރި 9 ބިދޭސީއަކަށް އިމިގްރޭޝަނަށް ހާޒިރުވުމަށް އަންގައި ނޯޓިސް ދީފި ކަމަށް އިމިގްރޭޝަނުން ބުނެފިއެވެ.

މިރޭ އެކްސްގައި ކުރި ޕޯސްޓެއްގައި އިމިގްރޭޝަނުން ބުނެފައިވަނީ ގަވާއިދާ ހިލާފަށް އުޅޭ ބިދޭސީން އަތުލައިގަތުމަށް މޯލްޑިވްސް އިމިގްރޭޝަނުން ކުރަމުންދާ މަސައްކަތުގެ ސަބަބުން ގިނަ އަދަދެއްގެ ބިދޭސީން މާލެ ދޫކޮށް ރާއްޖޭގެ އެކި ރަށްރަށަށް ދާކަމުގެ ރިޕޯޓް ލިބެމުންދާކަމަށެވެ.

އެހެންކަމުން އިމިގްރޭޝަނަށް ލިބުނު މައުލޫމާތާއިއެކު، ކުޅުދުއްފުއްޓަށް ދިއަ ބޯޓެއްގައި ތިބި ބިދޭސީންތަކެއް ބަލައި ފާސް ކޮށްފައިވާ ކަމަށް އިމިގްރޭޝަނުން ބުނެފައިވެއެވެ.

Advertisement

އިމިގްރޭޝަނުން ކުޅުދުއްފުށި ސިޓީގައި ހިނގާފައިވާ އޮޕަރޭޝަންގެ ތެރެއިން. ފޮޓޯ: އިމިގްރޭޝަން

ކުޅުދުއްފުށީ ސިޓީ ކައުންސިލާއި ޕޮލިސް އަދި އިމިގްރޭޝަން ގުޅިގެން ކުރިއަށް ގެންދިޔަ މިއޮޕަރޭޝަންގައި މި ބޯޓުގައި ދަތުރުކުރި ބިދޭސީންގެ ތެރެއިން ގަވާއިދާ ހިލާފަށް ތިބި 09 މީހުނަށް އިމިގްރޭޝަނަށް ހާޒިރުވުމަށް ނޯޓިސްދީފައިވާނޭ ކަމަށާއި، ބޯޓުގެ ކެޕްޓަނަށް ލިޔުމުން ނަސޭހަތްދީފައި ވާނޭ ކަމަށް އިމިގްރޭޝަނުން ބުނެފައިވެއެވެ.

މީގެއިތުރުން، އިމިގްރޭޝަނުގެ އެންގުމާ އެއްގޮތަށް އަމަލުނުކޮށްފިނަމަ އިމިގްރޭޝަން ޤާނޫނުގެ ދަށުން މިފަރާތްތަކުގެ މައްޗަށް ފިޔަވަޅު އަޅާނެ ކަމަށް ވެސް އިމިގްރޭޝަނުން ބުނެފައިވެއެވެ.