އަންހެނަކު ރަހީނުކުރި މައްސަލާގައި ފުލުހުންގެ ބެލުމުގެ ދަށުގައި މަރުވި ށ.މިލަންދޫ ހެޕީލޭންޑް، އާދަމް އަތުހަރުގެ ހަށިގަނޑު ޕޯސްޓްމޯޓަމް ހެދުމަށްފަހު މާލެ ގެނެސްފިއެވެ.

ފުލުހުން ވިދާޅުވީ ޕޯސްޓްމޯޓަމް ހެދުމަށްފަހު އާދަމް އަތުހަރުގެ ހަށިގަނޑު މިއަދު ހަވީރު 5 ޖެހިއިރު ރާއްޖެ ގެނެސް އާއިލާއާ ހަވާލުކުރުމުގެ ކަންކަން ކުރިއަށްދާކަމަށެވެ.

ފުލުހުން އަތުހަރު ހައްޔަރުކޮށްވަނީ މިދިޔަ އޮގަސްޓްމަހުގެ 29ވަނަ ދުވަހުގެ ރޭ މާލޭގައި އަންހެނަކު ރަހީނުކޮށްގެން ފިލަން މަސައްކަތްކުރަނިކޮށެވެ. އަތުހަރު ޖަލަށް ގެންގޮސް ބަންދުކުރީ އޭނާ ހައްޔަރުކުރަން އުޅުމުގެ ތެރޭގައި ލިބުނު އަނިޔާއަށް ފަރުވާ ދިނުމަށްފަހުއެވެ.

Advertisement

އަތުހަރަށް އައިޖީއެމްއެޗްގައި ފަރުވާދޭން ފެށީ މިދިޔަ އާދިއްތަދުވަހުގެ ރެއެވެ. ފަރުވާދެމުންދަނިކޮށް އޭނާ މަރުވީ މިދިޔަ ހޯމަދުވަހުގެ ހަވީރު 16:08 އެހާކަށްހާއިރުކަމަށެވެ.

ދާޚިލީ ސަލާމަތާ ފަންނިއްޔާތާ ބެހޭ ވުޒާރާއިން މިދިޔަ އަންގާރަދުވަހުގެ ރޭ ބޭއްވި ނޫސްވެރިންގެ ބައްދަލުވުމެއްގައި ވަޒީރު އަލީ އިހުސާން ވަނީ އަތުހަރު ގޮޅީގައި ދަންޖެހޭތަން ފެންނަ ސީސީޓީވީ ފުޓޭޖެއް ނޫސްވެރިންނަށް ދައްކާލާފައެވެ.

އަތުހަރުގެ ކަށުނަމާދު ބޭއްވުމަށް ހަމަޖެހިފައިވަނީ މިރޭ 10 ޖަހާއިރު ހުޅުމާލެ ސަހަރާ މިސްކިތުގައެވެ.އަތުހަރުގެ މަރާ ގުޅިގެން މިނިވަން މުއައްސަސާތަކުން ކުރަމުންދާ ތަޙްޤީގުތަކަށް ފުރިހަމަ އެއްބާރުލުންދޭނެކަމަށް ދިވެހި ފުލުހުންގެ ޚިދުމަތުންވަނީ ވިދާޅުވެފައެވެ.