ހދ. ހިރިމަރަދޫ މީހުން ކ. ތުލުސްދޫއަށް ބަދަލު ކޮށްދިނުމަށް އެ ރަށުގެ ކައުންސިލުން މިއަދު އެދިއްޖެއެވެ.

ހިރިމަރަދޫ ކައުންސިލުން މިފަދައިން އެދިފައިވަނީ އެ ކައުންސިލުން ލޯކަލް ގަވަމެންޓް އެންޑް ޕަބްލިކް ވޯކްސް މިނިސްޓްރީއާ އެކު ބޭއްވި ބައްދަލުވުމެއްގަ އެވެ. މި ކަން ހާމަކޮށް ލޯކަލް ގަވަމެންޓް އެންޑް ޕަބްލިކް ވޯކްސް މިނިސްޓަރު އެކްސްގައި ޕޯސްޓެއް ކުރައްވާފައިވެއެވެ.

މި ޕޯސްޓުގައި މިނިސްޓަރު ވިދާޅުވީ އެ ބައްދަލުވުމުގައި ހދ. ހިރިމަރަދޫ ރައްޔިތުން އެހެން ރަށަކަށް ބަދަލުވުމަށް އެ ރަށުގެ ރައްޔިތުން ނިންމާފައިވާ ކަމަށް ކައުންސިލްގެ މެންބަރުން ވިދާޅުވެފައިވާ ކަމަށެވެ. ހިރިމަރަދޫ ރައްޔިތުން ބޭނުންވަނީ ކ. ތުލުސްދޫ އަށް ބަދަލުވާން ކަމަށް ވެސް ކައުންސިލާއި ހަވާލާދެއްވައި މިނިސްޓަރު ވިދާޅުވިއެވެ.

Advertisement

ހިރިމަރަދޫ އަކީ ހދ. އަތޮޅުގެ އާބާދީ އެންމެ ކުޑަ ރަށެވެ. އެރަށުގެ ދިރިއުޅޭ އާބާދީއަކީ 293 އެކެވެ. އެއީ 157 ފިރިހެނުންނާއި 136 އަންހެނުންނެވެ.

އަހަރުން އަހަރަށް އެ ރަށުގެ އާބާދީ ދަށަށް ދާކަމަށް ތަފާސް ހިސާބުތަކުން ދައްކައެވެ. އެ ރަށުގެ އާބާދީގެ ތެރެއިން ގިނަ ބަޔަކު ވަނީ ރަށް ދޫކޮށް ހިޖުރަކޮށްފައެވެ.