ނ. ހޮޅުދޫގެ ގެއެއްގެ ތެރެއިން ޒަޚަމްތަކަކާއެކު މަރުވެފައި އޮއްވާ ފެނުނު ޒަކިއްޔާ މޫސާގެ ހަށިގަނޑު ވަޅުލައިފިއެވެ.

އިއްޔެގެ ވަގުތެއްގައި އިތުރު ތަހުލީލުކުރުމަށް ޒަކިއްޔާގެ ހަށިގަނޑު މާލެ ގެނެސްައިވެއެވެ. އަދި، މިއަދު ހެނދުނު ޒަކިއްޔާގެ ހަށިގަނޑު އަނބުރާ ހޮޅުދޫއަށް ފޮނުވައިލުމަށްފަހު ވަޅުލާފައިވަނީ މިއަދު މެންދުރު ނަމާދަށްފަހުގައެވެ.

އުމުރުން 50 އަހަރުގެ ޒަކިއްޔާ ވަޅުލިނަމަވެސް، އެ މައްސަލައިގެ ތަހުގީގުތައް ހުއްޓުމެއްނެތި ކުރިއަށްދާކަމަށް ފުލުހުން މައުލޫމާތުދީފައިވެއެވެ. އެގޮތުން، ޒަކިއްޔާގެ މަރު ތަހުގީގުކުރުމަށްޓަކައި ފުލުހުންގެ ހާއްސަ ޓީމެއް ހޮޅުދޫގައި ހަރަކާތްތެރިވަމުންދާކަން ފުލުހުން ފާހަގަކޮށްފައިވެއެވެ.

Advertisement

ދިޔަރެސްއަށް މައުލޫމާތު ލިބުނު ގޮތުގައި، ޒަކިއްޔާގެ ހަށިގަނޑު ފެނިފައިވަނީ އެ ގެއިން ކުނިނެގުމަށް ވަން މީހަކަށެވެ. އޭރު ޒަކިއްޔާގެ ކައިރީގައި ވަޅިއެއް އޮތްކަމަށާއި، އޭނާގެ ކަރަށް ބޮޑެތި ގެއްލުންތަކެއް ލިބިފައިވާކަމަށް ފުލުހުން މައުލޫމާތުދީފައިވެއެވެ.

މި މައްސަލާގައި މިހާތަނަށް މީހަކު ހައްޔަރުކޮށްފައެއް ނުވެއެވެ. ފުލުހުން ދަނީ މި މައްސަލައާއި ގުޅިގެން އިތުރަށް ބަލަމްޖެހޭ ކަންކަން ބަލަމުންނެވެ.