ބަރަހަނާ މަންޒަރު ދައްކުވައިދޭ ފޮޓޯއާއި ވީޑިއޯ ހިއްސާކުރާ ޗެނަލްތަކަށް ވަދެ ތިބޭ މީހުން ހޯދައި ގާނޫނީ ފިޔަވަޅު އަޅާނެ ކަމަށް ފުލުހުން ބުނެފި އެވެ.

ފުލުހުން ދާދިފަހުން ވަނީ މިފަދަ 571 ޗެނަލެއް ފުލުހުންގެ ބާރުގެ ދަށަށް ގެނެސް، ތިން މީހަކު ހައްޔަރުކޮށްފަ އެވެ. އެ ތިން މީހުންނަކީ އދ. މަހިބަދޫ ބަހާރުގެ، ޒުބައިރު އަލީ (45އ)، ކ. މާލެ ދަފްތަރު ނަންބަރު ރސ14751 ނާސިފް އަލީ (46އ) އަދި ކ. ކާށިދޫ ސިލިންކޯ، އިސްމާއީލް ރަބީހް (29އ) އެވެ.

މިއަދު ބޭއްވި ނޫސްވެރިންގެ ބައްދަލުވުމެއްގައި ފުލުހުންގެ ސައިބާ ކްރައިމް ސެންޓާގެ ހެޑް ސުޕްރިޓެންޑެންޓް އޮފް ޕޮލިސް މުހައްމަދު ސަމީހު ވިދާޅުވީ މިފަދަ ޗެނަލްތަކަށް ފައިސާ ދައްކާ އަދި މިފަދަ ޗެނަލްތަކަށް ވަދެ ތިބުމަކީ ކުށެއް ކަމަށެވެ.

Advertisement

"މިފަދަ ޗެނަލްތަކަށް ވަދެ ތިބޭ ފަރާތްތައް ހޯދާ ގާނޫނީ ހަމަތަކުގެ މަތިން ދިވެހި ފުލުހުންގެ ހިދުމަތުން ފިޔަވަޅު އަޅާނަންކަން ފާހަގަކޮށްލަން،" ސަމީހު ވިދާޅުވި އެވެ.

އަދި މިފަދަ މައްސަލަތަކުގައި ޝިކާއަރަކަށް ވެފައިވާ ފަރާތްތަކުން ލަސްނުކޮށް ފުލުހުންނަށް އެ މައުލޫމާތު ހިއްސާކޮށްދިނުމަށް ވެސް ވަނީ އެދިފަ އެވެ. އެގޮތަށް ހިއްސާކުރާ މައުލޫމާތުގެ ސިއްރުކަން ފުލުހުން ހިފަހައްޓާނެ ކަމުގެ ޔަގީންކަން ވެސް ވަނީ އަރުވާފަ އެވެ.

ފުލުހުން ހާމަކޮށްފައިވާ މައުލޫމާތުތަކަށް ބަލާއިރު އަތުލައިގަތް ޗެނަލްތަކަށް 34،680 މީހުން ސަބްސްކްރައިބް ކޮށްފައިވެ އެވެ. މި މައްސަލާގައި ތުހުމަތުކުރެވޭ ފަރާތްތަކުން ސަބްސްކްރިޕްޝަން ފީގެ ގޮތުގައި 2 މިލިޔަނެއްހާ ރުފިޔާ ނަހަމަގޮތުގައި ހޯދާފައިވާ ކަމަށްވެސް ފުލުހުން ބުނެފައިވެ އެވެ.