ސްޕެނިޝް ލީގުގައި ރޭ ރެއާލް ސޮސިއެޑާޑްގެ މައްޗަށް 2-0 އިން ރެއާލް މެޑްރިޑުން ކުރި ހޯދައިފި އެވެ.

ސޮސިއެޑާޑްގެ ދަނޑުގައި ކުޅުނު މި މެޗުގެ ފުރަތަމަ ހާފުގައި ގޯލެއް ފެނިގެން ގޮސްފައިވާއިރު، މި ހާފުގައި ސޮސިއެޑާޑުން ފޮނުވާލި ދެ ހަމަލާއެއް ރެއާލްގެ ގޯލުގެ ދަނޑި އަށް އަމާޒުވެފައިވެ އެވެ. އަދި ދެވަނަ ހާފުގައި ވެސް އެޓީމުން ފޮނުވާލި ހަމަލާއެއް ދަނޑި އަށް އެރި އެވެ.

މި މެޗުގައި ފެނިގެންދިޔަ ފުރަތަމަ ގޯލު ރެއާލަށް މެޗުގެ 58 ވަނަ މިނެޓްގައި ލިބުނު ޕެނަލްޓީއަކުން ކާމިޔާބުކޮށްދިނީ ވިނީޝަސް ޖޫނިއާ އެވެ. މިއީ އާޑާ ގުލާ ފޮނުވާލި ބާރު ހަމަލާއެއް ސޮސިއެޑާޑްގެ ޑިފެންޑަރު ސާޖިއޯ ގޮމޭޒްގެ އަތުގައި ޖެހުމުން ލިބުނު ޕެނަލްޓީއެކެވެ.

Advertisement

ރެއާލްގެ ދެވަނަ ގޯލަކީ ވެސް ޕެނަލްޓީ އަކުން ކާމިޔާބު ކުރި ގޯލެކެވެ. ވިނީޝަސް އަށް ކުރި ފައުލަކާއި ގުޅިގެން ލިބުނު މި ޕެނަލްޓީ ވައްދާލައިގެން ރެއާލްގެ ދެވަނަ ގޯލު މެޗުގެ 75 ވަނަ މިނެޓްގައި ކާމިޔާބުކޮށްދިނީ ކިލިއަން އެމްބާޕޭ އެވެ. 

ލީގުގައި ކުޅުނު ފުރަތަމަ ފަސް މެޗުގެ ތެރެއިން ހަތަރު މެޗުން ރެއާލް ވަނީ މޮޅުވެފަ އެވެ. އަނެއް މެޗުން އެޓީމު ވީ އެއްވަރެވެ. އެއްވަނައިގައި އޮތް ބާސާ އަށް ވުރެ އެއް ޕޮއިންޓު ފަހަތުން ރެއާލް އޮތީ ލީގުގެ ދެވަނައިގަ އެވެ.

ބާސާ އިން މިރޭ ލީގުގައި ނިކުންނާނީ ރަށުން ބޭރުގައި ޖިރޯނާއާ ދެކޮޅަށެވެ.