ޑރ. މުހައްމަދު އިޔާޒުގެ އަނބިކަނބަލުން ވަރިކުރަން ނުބުނާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަހުމަދު ވިދާޅުވެއްޖެއެވެ.

ސަފީރުންނަށް އުނދަގޫކޮށް އެމްބަސީތައް ކައިރީގައި އެއްވެ އަޑުގަދަކުރާ މައްސަލައިގައި ޑރ. މުހައްމަދު އިޔާޒުގެ އަނބިކަނބަލުން އާއިޝަތު ޝާދިޔާ އާއި ޑރ. ޝަޒްރާ އިބްރާހީމް ހައްޔަރުކޮށް ބަންދު ކުރިއެވެ. އެ ދެ މީހުން މިހާރު ބަންދުން ދޫކޮށްލާފައިވާއިރު އެމީހުންގެ ބަންދުން ދޫކޮށްލިފަހުން ސޯޝަލްމީޑިއާގައި ވަނީ، މިނިސްޓަރު ޑރ. ޝަހީމް އިޔާޒްގެ އަނބިކަނބަލުން ވަރިކުރުމަށް އިޔާޒްކައިރީ ބުނިކަމަށް ބުނާ ވާހަކަތަކެއް ފެތުރިފައެވެ.

މިއަދު ރައީސް އޮފީހުގައި ކުރިއަށް ގެންދިޔަ ނޫސްވެރިންގެ ބައްދަލުވުމުގައި ނޫސްވެރިއަކު ވަނީ މިނިސްޓަރު ޝަހީމާ މިކަމާ ގުޅޭގޮތުން ސުވާލު ކޮށްފައެވެ.

Advertisement

އެ ސުވާލަށް ޖަވާބު ދެއްވަމުން ޝަހީމް ވިދާޅުވީ އިޔާޒްގެ އަނބިކަނބަލުން ވަރިކުރުމަށް ބުނެފައި ނުވާނެ ކަމަށެވެ.

"އެހެންނޫނަސް، އިޔާޒްގެ އަންހެނުން އިޔާޒް ބުނާ ބަސްނާހާ އުޅެންޏާ، އަޅުގަނޑުމިއީ އިޔާޒްގެ ރަހުމަތްތެރިއަކަށް ވަންޏާ، މީހަކު މެދުވެރިކޮށްވެސް އިޔާޒް ކައިރީ އަޅުގަނޑު ބުނެފާނެ ބަސްނާހާ މީހަކާ އެއްކޮށް ނޫޅޭށޭ. އެއީ ރަހުމަތްތެރިކަމުގެ ގޮތުން ބުނާ އެއްޗެއް ދެއްތޯ އެހެން ބުނެފިއްޔާމުވެސް." ޝަހީމް ވިދާޅުވިއެވެ.

އިޔާޒްގެ އަނބިކަނބަލުން ވަރިކުރަން އިޔާޒް ކައިރީގައި ނުބުނާ ކަމަށް ޝަހީމް ތަކުރާރުކޮށް ވިދާޅުވިއެވެ. އަދި ޑރ. އިޔާޒާ ނުގުޅާތާ އެތައް މަހެއް ވެފައިވާ ކަމަށްވެސް ވިދާޅުވިއެވެ.

މީގެއިތުރުން ޝަހީމް ވިދާޅުވީ އިޔާޒްގެ އަނބިކަނބަލުން ހައްޔަރުކުރީ ފަލަސްތީނުގެ ވާހަކަ ދައްކައިގެން ކަމަށް ގަބޫލު ނުކުރާ ކަމަށެވެ. ސަފީރުން ތިބޭ ގޭގެއަށްގޮސް އެއްޗެހި އެޅުމަކީ ބައިނަލްއަގްވާމީ ގާނޫނުގައިވެސް މަނާ ކަމެއް ކަމަށާއި އެއްވެސް ގައުމެއްގައި އެގޮތަށް އެކަން ނުކުރެވޭނެ ކަމަށެވެ. ޝަހީމް ވިދާޅުވީ ވަކި ގައުމެއްގެ ސަފީރަކަށް ތާގެޓްކޮށްގެން އެބޭފުޅާގެ ގޭދޮށަށް ގޮސް، ފަތިސް ނަމާދުން ފައިބާގޮތަށް އަަޑުގަދަކޮށް އެގޭގައި ތިބޭ ކުޑަކުދިންނަށްދާންދެން އުނދަގޫ ކުރުމަކީ އިސްލާމް ދީނުގައި މިކަން އޮންނަގޮތް ނޫން ކަމަށެވެ.