ޔުއެފާ ޗެމްޕިއަންސް ލީގުގައި ރޭ ކުޅުނު މެޗުން މެންޗެސްޓާ ސިޓީ އެއްވަރުވިއިރު، ޕީއެސްޖީން ހަނި މޮޅެއް ހޯދައިފި އެވެ.

އަމިއްލަ ދަނޑުގައި ކުޅެ ސިޓީ ލަނޑެއް ނުޖެހި އެއްވަރުވީ އިޓަލީގެ އިންޓަ މިލާނާއި ދެކޮޅަށް ކުޅެގެންނެވެ. މިއީ 2023 ވަނަ އަހަރުގެ ޗެމްޕިއަންސް ލީގުގެ ފައިނަލަށް ފަހު މި ދެ ޓީމު ބައްދަލުކުރި ފުރަތަމަ މެޗެވެ.

މި މެޗުގައި ގޯލެއް ފެނިގެން ގޮސްފައި ނުވި ނަމަވެސް ދެ ޓީމަށް ވެސް ގޯލުޖަހާނެ ރަނގަޅު ފުރުސަތުތަކެއް ލިބިގެން ގޮސްފަ އެވެ. އެގޮތުން ދެވަނަ ހާފްގައި ކުޅެން އެރި ފިލް ފޮޑެން އިންޓަގެ އޭރިއާ ތެރޭ ފުދޭވަރަކަށް ހުހަށް ހުރެ ފޮނުވާލި ބާރު ހަމަލާ އެޓީމުގެ ގޯލްކީޕަރު ޔާން ސޮމާ މަތަކުރިއިރު، މެޗުގެ ފަހު ވަގުތުކޮޅުތެރޭ ސިޓީގެ އިލްކާއި ގުންޑޮގާނަށް ވެސް ރަނގަޅު ދެ ފުރުސަތެއް ލިބި ބޭކާރުވެފައިވެ އެވެ.

Advertisement

ކައުންޓަ އެޓޭކުތަކުގައި ސިޓީގެ ގޯލަށް ނުރައްކާ ކުރަން އިންޓަ އިން މަސައްކަތް ކުރިއިރު، އެންމެ ފާހަގަކޮށްލެވެނީ ދެވަނަ ހާފުގައި ކުޅެން އެރި ހެކްރިކް މިކިތާރިން އަށް ލިބުނު ފުރުސަތެެވެ. ސިޓީގެ ގޯލާއި ފުދޭވަރަކަށް ކައިރީ ހުރެ އޭނާ ފޮނުވާލި ބާރު ހަމަލާ ދިޔައީ ދަނޑި މަތިން ބޭރަށެވެ.

ޕީއެސްޖީ ރޭ މޮޅުވީ މުބާރާތުގައި އަލަށް ވާދަކުރާ ސްޕެއިންގެ ޖިރޯނާއާ ބައްދަލުކޮށް 1-0 އިންނެވެ.

ޖިރޯނާގެ ފަރާތުން ރަނގަޅު ޑިފެންސިވް ކުޅުމެއް ފެނިގެންދިޔަ މި މެޗުގައި ފެނިގެންދިޔަ ހަމައެކަނި ގޯލަކީ މެޗުގެ 90 ވަނަ މިނެޓްގައި ޖިރޯނާގެ ގޯލްކީޕަރު ޕައުލޯ ގަޒަނިގާ އަތުން ބައިކޮޅަށް ވަތް ގޯލެކެވެ. މިއީ ޕީއެސްޖީގެ ނޫނޯ މެންޑޭސް ފޮނުވާލި ހަމަލާއެއް ކީޕަރު ނަގަން އުޅުމުގެ ތެރޭގައި އޭނާގެ ފައިދަށުން ގޮސް ވަތް ގޯލެކެވެ.

ލީގު އުސޫލުން ކުރިއަށްދާ ޗެމްޕިއަންސް ލީގުގައި މިފަހަރު 36 ޓީމެއް ވާދަކުރާއިރު، ކޮންމެ ޓީމަކުން ވެސް ޖުމްލަ އަށް މެޗު ކުޅޭނެ އެވެ. އޭގެތެރެއިން ހަތަރު މެޗު ކުޅޭނީ އަމިއްލަ ދަނޑުގައި ކަމަށްވާއިރު އަނެއް ހަތަރު މެޗު ކުޅޭނީ ރަށުން ބޭރުގަ އެވެ. ލީގު ބުރު ނިމޭއިރު އެންމެ ގިނަ ޕޮއިންޓު ހޯދާ ގަދަ އަށް ޓީމު މުބާރާތުގެ ގަދަ 16 އަށް ދަތުރުކުރާނެ އެވެ.

އަދި ނުވަ ވަނައިން ފެށިގެން 24 ވަނަ އާ ދެމެދުގައި ހިމެނޭ ޓީމުތައް ދެވަނަ ބުރަށް ދިޔުމަށް ކުޅޭނީ ޕްލޭއޮފް ބުރެކެވެ. އޭގެެއިން މޮޅުވާ އަށް ޓީމަކަށް ގަދަ 16 އިން ޖާގަ ލިބޭނެ އެވެ.