ޖިނާއީ ޢަދުލުގެ ނިޒާމު އިތުރަށް ހަރުދަނާކޮށް ކުރިއެރުވުމާ ގުޅޭގޮތުން ބަންޑާރަ ނައިބު އަހުމަދު އުޝާމް އަދި ޕްރޮސިކިއުޓާ ޖެނެރަލް އައްބާސް ޝަރީފް މަޝްވަރާ ކުރައްވައިފިއެވެ.

މި މަޝްވަރާ ކުރިއަށް ގެންގޮސްފައިވަނީ މިއަދު އޭޖީ އޮފީހުގައި ދެ ބޭފުޅުން ބޭއްވި ބައްދަލުކުރެއްވުމުގައެވެ.

މި ބައްދަލުކުރެއްވުމުގައި ބަންޑާރަ ނައިބު ވަނީ ޕީޖީގެ މަގާމަށް އައްބާސް އައްޔަންކުރެއްވުމާ ގުޅިގެން އޭނާއަށް މަރުހަބާ ވިދާޅުވެފައެވެ.

ޕީޖީ އޮފީހުން ބުނީ މި ބައްދަލުކުރެއްވުމުގައި ޖިނާއީ އަދުލުގެ ނިޒާމާ ގުޅޭގޮތުން މަޝްވަރާ ކުރައްވައި، ޖިނާއީ ޢަދުލުގެ ނިޒާމު އިތުރަށް ފުރިހަމަކުރުމަށް ޕީޖީ ގެންގުޅުއްވާ ތަސައްވަރު އުޝާމްއާ ހިއްސާކުރެއްވި ކަމަށެވެ.

މި ބައްދަލުކުރެއްވުމުގައި އުޝާމް ވަނީ މަގާމުގެ ޒިންމާތައް އަދާކުރެއްވުމުގައި، ތެދުވެރިކަމާއެކު ދެމިހުންނެވުމަށް އައްބާސްއަށް ހިތްވަރު ދެއްވާފައެވެ.

ރައީސް އޮފީހުގެ ލީގަލް ސެކްރެޓަރަކީ ކަމުގެ މަގާމުގައި ހުންނެވި އައްބާސް ޝަރީފް ޕީޖީ ކަމަށް އައްޔަންކުރެއްވީ އިއްޔެއެވެ. އޭނާއަށް އެ މަގާމަށް އައްޔަންކުރުމަށް ރުހުން ދޭން ފެންނަ ކަމަށް މަޖިލީހުން ފާސްކުރީ 85 މެންބަރުންގެ އިއްތިފާގުންނެވެ.

ގާނޫނީ ދާއިރާއިން މަތީ ތައުލީމް ހާސިލް ކުރެއްވުމަށް ފަހު އައްބާސް ވަނީ މީގެކުރިން ހައި ކޯޓުގެ ފަނޑިޔާރުކަން ވެސް ކުރައްވާފައެވެ.

ގާނޫނުއަސާސީގެ 220 ވަނަ މާއްދާގެ (ނ) ގައި ބަޔާންކޮށްފައިވާ ގޮތުގައި ޕީޖީގެ މަސްއޫލިއްޔަތުތައް އަދާކޮށް، ބާރުތައް ބޭނުންކުރާންވާނީ އެއްވެސް ފަރާތަކަށް ޖެހިލުންވުމެއްނެތި ، ވަކިފަރާތަކަށް މަންފާއެއް ހޯދައިދިނުމެއްނެތި، ތައައްސުބުން އެއްކިބާވެ ހުރެ ބަންޑާރަނައިބު ކަނޑައަޅުއްވާ މައިގަނޑު ސިޔާސަތުތަކާ އެއްގޮތަށެވެ.

އެހެންކަމުން ޕްރޮސިކިއުޓާ ޖެނެރަލްގެ މަސައްކަތްތައް ބަންޓައްކުރާނެ ގޮތުގެ މައިގަނޑު ސިޔާސަތުތައް ކަނޑައަޅާ ފަރާތަކީ ބަންޑާރަ ނައިބެވެ.