ސްރީ ލަންކާގައި އިއްޔެ ބޭއްވި ރިޔާސީ އިންތިހާބުގެ ވަގުތީ ނަތީޖާ ދައްކާ ގޮތުން ނެޝަނަލް ޕީޕަލްސް ޕަވާ (އެންޕީޕީ) ގެ ކެންޑިޑޭޓް އަރޫނާ ކުމާރަ ޑިސަނަޔަކަ އިންތިހާބު ކާމިޔާބުކޮށްފިި އެވެ.

ޖުމްލަ 38 ކެންޑިޑޭޓަކު އިންތިހާބުގައި ވާދަކުރި އިރު، އޭގެ ތެރޭގައި މިހާރުގެ ރައީސް ރަނިލް ވިކްރަމަސިންހަ ވެސް ހިމެނެ އެވެ. ވޯޓްލުމުުގެ ހައްގު 17 މިލިއަން މީހުންނަށް ލިބުނު އިންތިހާބުގައި ގިނަ އަދަދެއްގެ ކެންޑިޑޭޓުންތަކެއް ވާދަކުރި، އެންމެ ގާތުން ވާދަކުރެއްވި ތިން ކެންޑިޑޭޓުންނަކީ ޑިސަނަޔަކަ އާއި ޔުނައިޓެޑް ނެޝަނަލް ޕާޓީ (އެންޔޫޕީ) އަށް ނިސްބަތްވާ ރަނިލްގެ އިތުރުން ސަމާގީ ޖަނާ ބަޓަވެގަޔާ (އެސްޖޭބީ) ގެ ކެންޑިޑޭޓް ސަޖިތު ޕްރަމަސާދާ އެވެ.

ވަގުތީ ނަތީޖާ މިހާތަނަށް ދައްކާ ގޮތުން ޑިސަނަޔަކު އިންތިހާބުގެ ކުރި ހޯއްދެވީ ވޯޓްލީ މީހުންގެ 51 ޕަސެންޓާ އެކީގަ އެވެ. އޭނަ ހޯއްދެވި ކާމިޔާބީއާ ގުޅިގެން ޕްރަމަދާސާ މިއަދު ވަނީ މަރުހަބާ ވެސް ވިދާޅުވެފަ އެވެ.

Advertisement

ލަންކާގެ އިލެކްޝަން ކޮމިޝަބުން ބުނެފައިވާ ގޮތުގައި މި އިންތިހާބުގައި 75 ޕަސެންޓް މީހުން ވޯޓްލާފައިވެ އެވެ.

އުމުރުން މިހާރު 55 އަހަރުގެ ޑިސަނަޔަކަ އަކީ ލަންކާގެ ގާނޫނު ހަދާ މަޖިލީހުގެ މެންބަރުކަމާއި ކުރިން މިނިސްޓަރުކަން ވެސް ކުރެއްވި އެވެ. އޭނަ އެގްރިކަލްޗަ، ލޭންޑް އެންޑް ލައިވްސްޓޮކް މިނިސްޓަރުކަމުގެ މަގާމު އަދާކުރެއްވީ 2000-2004 އަށެވެ.

ލަންކާގެ ރައީސްކަން ރައްޔިތުން އާ ވެރިއަކާ ހަވާލު ކުރަން ނިންމި އިރު، 2022 އިން ފެށިގެން އެ ގައުމު އޮތީ މާލީ އަދި އިގުތިސާދީ ވަރަށް ބޮޑު ތާށިކަމެއްގެ ތެރޭގަ އެވެ. އެހެންވެ ކެމްޕޭން ތެރޭގައި އަނޫރަ އެންމެ ބޮޑަށް ވައުދުވެވަޑައިގަތް އެއް ކަމަކީ ވެސް ގައުމުގެ އިގުތިސާދީ ހާލަތު ރަނގަޅުކޮށް ދެއްވުމެވެ.